Huawei $90 долларлик смартфон ва илғор фаблетни намойиш қилди
Huawei компанияси 1 август куни ташкил қилган тақдимотида Honor Note 8 фаблети ҳамда Honor Play 5 бошланғич даражали смартфонни намойиш қилди.
Дисплей диагонали 6,6 дюйм бўлган Honor Note 8 фаблетининг экранининг сиғими QHD (2560 × 1440 кисель) бўлиб, у юқори сифатли Super AMOLED платформасида ишлайди.
Ингичка ромли фаблетнинг ўлчамлари: 178,8 × 90,9 × 7,18 мм, оғирлиги — 219 грамм.
Гаджетнинг «юраги» — Kirin 955 фирма процессори бўлиб, ҳар бири 4 ядроли 2 та — 2,5 ГГц Cortex-A72 ва энерго-тежамкор 1,8-ГГц Cortex-A53 процессор, жами 8 ядрога эга. Фаблетда график-тасвирни қайта ишлаш учун марказлаштирилган Mali T880-MP4 видеокартаси масъул. Қурилма тезкор хотирасининг сиғими 4 Гбайт.
Honor Note 8 мобиль алоқа воситасида 2 тусли фоточақноқ, суратни оптик барқарорлаштириш тизими билан таъминланган, f/2.0 диафрагмали 13 мегапикселли бош камера мавжуд. Видеотелефония ва селфи-съёмкаси учун 8 мегапикселли олд камера ўрнатилган.
Honor Note 8’нинг дастурий платформаси сифатида Android 6.0 Marshmallow операцион тизимининг EMUI 4.1. мослаштирилган интерфейси татбиқ этилган. Фаблетда бармоқ излари сканери жорий қилинган.
Фаблет Wi-Fi 802.11a/b/g/n/ac (2,4/5 ГГц) ва Bluetooth 4.2, GPS, NFC каби симсиз алоқа тармоғи, USB Type-C туридаги портга эга.
Гибрид SIM-карта бўлмачасига 2 та кичик ҳажмдаги сим-карта ёки 1 та сим-карта ва 1 та қўшимча хотира картаси (microSD) ўрнатиш мумкин. Смартфоннинг қуввати учун 4500 мА соат электр токи сиғимига эга аккумулятор.
Фаблет мобиль алоқа тармоғининг 4-авлоди ҳамда VoLTE, яъни LTE тармоғида овозли хабарлар жўнатиш технологиясини қўллаб-қувватлайди.
Honor Note 8’нинг 32, 64 ва 128 Гбайт доимий ички хотира талқинлари жорий йилнинг 9 августидан 350, 380 ва 420 АҚШ доллари нархларида Хитой бозорида сотувга чиқарилади.
Бугун намойиш этиладиган Samsung Galaxy Note 7’дан 1 кун олдин эълон қилинган Honor Note 8 смартфон бозорида кореялик янги фаблет билан “жанг” қилиши тахмин қилинмоқда. Бугун самсунгнинг янги фаблети ҳақидаги батафсил маълумотларни сизга етказамиз.
Шу билан бирга, Huawei шу куни тақдим қилган Honor Play 5 смартфони энг содда даражали бўлиб, 5 дюймли ва 1280×720 пиксель сиғимли дисплей, 4 ядроли MediaTek MT6735P процессори, Mali-T720 видеокарта, 2 ГБ оператив ҳамда 16 ГБ доимий, кенгайтириш мумкин бўлган хотира, 8 ва 2 Мп камералар, шунингдек 2200 мА соат аккумуляторга эга.
Номидан ва ички техник имкониятларидан кўриниб турибдики, мазкур ҳамёнбоп гаджетда замонавий ўйинларни ўйнаш мумкин. Honor Play 5 “ақлли телефон”и сотувга 2 августдан 90 АҚШ долларидан чиқарилади.
