LG V20 – 32-битли Hi-Fi Quad DAC чип ўрнатилган жаҳондаги илк смартфон

Аввалроқ хабар берганимиздек, LG V20 Android операцион тизимининг янги талқини – Nougat (Android 7.0 Nougat )да ишлайдиган илк смартфон бўлиши кутилмоқда.
Куни-кеча тақдимоти кутилаётган ушбу смартфонга тегишли бошқа муҳим маълумот ҳам интернетда пайдо бўлди.

lgnewsroom.com сайтининг ёзишича, LG V20 Hi-Fi Quad DAC технологияси тадбиқ этилган жаҳондаги илк смартфон бўлади. Мазкур технология атрофдаги шовқинни 50% гача камайтириш ва рақамли файлларни аналог товушларга ўгириш ҳисобига товушларни янада тиниқ ва аниқ эшитилишини таъминлайди. Натижада фойдаланувчилар видеога тўлқинларнинг шариллаши ёки шовқинли жойда икки инсоннинг аниқ эшитиладиган суҳбатлари каби юқори сифатли саундтрекларни қўшишлари мумкин бўлади. LG компаниясининг хабар беришича, мос наушниклар ишлатилганда Quad DAC технологияси смартфондаги товушларни табиий товушларга яқин сифатда тақдим этади.

LG мазкур технологияни яратишда юқори сифатли аудио маҳсулотлар ишлаб чиқариш бўйича жаҳондаги илғор ESS Technology компанияси билан ҳамкорлик қилган.