HP: Windows 10 Mobile операцион тизимида смартфонларни ишлаб чиқарамиз
Сўнгги йиллар давомида HP турли операцион тизимларни синаб кўрди. Аммо компания кўп ҳолларда Windows дастурини маъқул кўради. Ҳозирда HP Windows 10 Mobile операцион тизимида ишлайдиган мобил қурилмаларни ишлаб чиқаришни режалаштириб, Android тизимидан воз кечмоқда. Бунинг сабаби шуки, компания планшет ва компьютерларни ишлаб чиқаришни мақсад қилган.
HP бу стратегияси билан Dell компаниясининг ишини такрорламоқда. Гап шундаки, Dell ҳам Windows дастурига янада кучли урғу бериш учун Android платформасида маҳсулот ишлаб чиқаришни тўхтатган эди. Бу орада Lenovo гарчи Android платформасидаги планшет ва смартфонларни сотаётган бўлса-да, аммо планшетларда ушбу дастурнинг улушини камайтириб, у ҳам Windowsнинг имкониятларини кенг баҳоламоқда.
HP компаниясининг мақсади жуда оддий: у барча маҳсулотларни Apple сингари ягона операцион тизим атрофида бирлаштирмоқчи. Бу мақсад Samsung учун ҳам бағоятда долзарб. Негаки унинг турли формфактордаги маҳсулотлари ҳар хил плат формаларда ишламоқда. Масалан, ноутбуклари Windows, планшет ва смартфонлар Android, смартвотч ва телевизорлар Tizen дастурида фаолият кўрсатади. Агар жанубий кореялик гигант ўз вақтида бу ишга қўл урмаса, келажакда барча қурилмаларини ўзаро бир-бирига боғлашда муаммоларга учраши мумкин.
Ҳозирда HP Windows 10 Mobile дастурида ишлайдиган Elite X3 қурилмаси билан смартфон бозорига қайта кириб келмоқда. Windows 10 Mobile дастуридаги смартфонларни ишлаб чиқараётган компания, шу йилнинг биринчи чорагида Gartner келтирган маълумотларга кўра, смартфон бозорининг атиги 0.7 фоизини эгаллай олган, холос.
Аслида, воқеаларга реал қараладиган бўлса, HP шубҳасиз, Windows 10 Mobile ва Android платформаларида смартфон яратиши мумкин эди. Бироқ компаниянинг компьютерлари ва виртуал реаллик қурилмалари учун Windows дастури афзал ҳисобланади.
HP вице-президенти Майкл Паркнинг айтишича, Windows 10 Mobile смартфон бозорида катта улушга эга эмас. Бу эса ушбу дастурда ишлайдиган қурилмалар савдосига салбий таъсир қилиши табиий. Аммо компания айни вақтда Windows компьютерларидаги иловалардан фойдалаётган офис ишчилари учун премиум даражадаги маҳсулотлар ишлаб чиқаришни кўзда тутган. HP бундай қарор компанияга катта даромадга келтиришига ишонмоқда.
