Linux операцион тизими яратилганига 25 йил бўлди
1991 йилнинг 25 август куни дастурчи Линус Тосвальдс интернетда ўз ҳамкасбларидан янги операцион тизимни яратишда кўмаклашишни сўраб хабар ёзган эди. Ўша пайтда кун келиб Linux дастури жаҳонда энг кенг тарқалган очиқ операцион тизимга айланишини ҳеч ким ўйламаган эди.
Linux базасидаги операцион тизимлар бугун суперкомпьютерлар, микрокомпьютерлар, сервер ва смартфонлар бозорида етакчилардан ҳисобланади. Буларнинг барчаси эса шунчаки бир ҳаваскор дастурчининг хоббисидан келиб чиққан. Демак, ҳеч қачон янги ғояларни синаб кўришдан эринмаслик керак. Ким билади, бир кун келиб ушбу митти ғоя фазоларни забт этса…
“Барча Minix фойдаланувчиларига салом! Мен 386 (486) AT клонлари учун операцион тизим яратмоқдаман (бу шунчаки хобби, у gnu сингари катта ва мукаммал бўлмайди)”, – деб ёзган эди Линус Usenet comp.os.minix форумида.
У мана шу сўзлар ҳаётидаги энг катта лойиҳага пойдевор қўйган эди. Бу худди хобби асосий машғулотга айланиб, сен ўз севган ишингни қилиш билан пул топишга ўхшайди.
Ахир, бу мароқли эмасми!?
Куни кеча Linux Foundation компанияси ўзининг чорак асрлик ютуқлари ҳақида батафсил ҳисоботни чоп этди. 2005 йилдан бери Linux дастурининг ривожига 1300 та компаниядан бўлган 13 500 дан ортиқ мутахассислар ўз ҳиссаларини қўшганлар. 3.19 ва 4.7 версиялари давомида Тосвальдснинг операцион тизими соатига 7,8 патчни қабул қилган. Intel, Red Hat, Linaro, Samsung, SUSE, IBM, Renesas, Google, AMD, Taxas Instuments ва ARM лойиҳанинг йирик ҳомийлари ҳисобланади.
Линус Тосвальдс ўзининг дастури билан компьютерлар саноатини эгаллаши, ва керак бўлса бунга яна 25 йил сарфлаши мумкинлигини айтиб ўтган.
Бугунги кунда компьютерлар бозорининг (операцион тизим назарда тутилмоқда) катта қисмини Microsoft эгаллаган, Mac OS иккинчи, Linux эса учинчи ўринни банд қилган. Аммо мобиль қурилмалар саноатида Linux базасида яратилган Android операцион тизими етакчилик қилиб келмоқда.
