Samsung Push Service: бир чимдим кулги

Сарлавҳадан бу Push Service нима экан, деган савол хаёлингиздан ўтган бўлиши мумкин. Албатта, бундай сервислар кўпчиликка таниш эмас. Хўш, у нима ўзи?

Барча смартфон ишлаб чиқарувчи компаниялар ўзларига тегишли махсус сервисларга эга. Push Service ушбу сервисларга тегишли маълумотларни сервердан фойдаланувчи телефонига етказишда хизмат қиладиган тизим. Агар телефонда ушбу сервисга тегишли илова ўрнатилмаган ёки ўзингиз уни ўчириб юборган бўлсангиз, компаниянинг махсус хизматларига алоқадор билдиришномаларни қабул қилолмайсиз. Samsung ҳолатида бу Samsung Apps, AllsharePlay, Samsung Wallet каби сервислар бўлиши мумкин.

Бу илованинг нима вазифа бажаришини яхши тушунмаган смартфон фойдаланувчилари Google Play’да ушбу сервисга қарашли илова остида жуда кўп кулгили ва қизиқарли изоҳларни қолдиришган.

Масалан, Иван Ефремов деган фойдаланувчи энди унинг телефони беморларни даволаётгани, умуман зарядланишга муҳтож эмаслиги, хаёлдаги фикрларни англаб, ўликлар билан сўзлашаётгани ҳақида ҳазиломуз изоҳ қолдирган (скриншот).

Вячеслав Беляев эса илова сўнгги версияга янгиланганидан кейин, телефон энди уйга ўлик қуш ва сичқонларни олиб келмай, квант физикаси тўғрисида маъруза ёзаётганидан нолиган (скриншот).

Юлия Гаврилычева бўлса дўстининг пуш-сервис иловасини янгилагандан кейин учишни ўрганганини, барча энди унга транспортда жой бўшатаётганини ёзиб ўтган. Бундан ташқари у иловани Россия футбол жамоаси гуруҳдан чиқишига умид қилиб, Европа чемпионатидан олдин янгилишини ёзган.

Албатта, буларнинг бари ҳазил тариқасида фойдаланувчилар томонидан изоҳларда акс этган. Ушбу илова, чиндан ҳам, махсус сервисларнинг фаолияти учун жуда аҳамиятли.