Хитойнинг топ-20 та смартфон ишлаб чиқарувчилари
Beijing Sino Statistical Agency агентлиги шу йилнинг биринчи ярмида Хитойда сотилган смартфонлар рейтинги ҳақида ўз ахборотларини эълон қилди. Ташкилотнинг маълумот беришича, ушбу давр мобайнида Хитойда жами 250 млн дона қурилма сотилган, уларнинг қарийб 60 миллиони интернет орқали харид қилинган. Sino агентлиги онлайн (яъни интернет орқали) ва офлайн (дўконларда) сотилган қурилмалар бўйича алоҳида ҳисобот тайёрлайди. Келинг, эътиборимизни биринчи онлайн сотувларга қаратсак.
Бир пайтлар онлайн савдоларга жиддий киришган Xiaomi ҳалигача ушбу йўналишнинг етакчиси бўлиб қолмоқда. Xiaomi компаниясига фақат Huawei кўрсаткичлар билан анча яқин. Қолган брендлар эса катта фарқ билан ортда қолмоқда. Юқоридаги иккита компания бутун Хитойдаги онлайн сотувлар ҳажмининг ярмини банд қилишмоқда. Рўйхатдаги бешликка LeEco, Apple ва Meizu ҳам кирган. Лекин уларнинг кўрсаткичлари Xiaomi ва Huawei кўрсаткичларидан 3 баравар пастроқ. Сўнгги вақтларда ушбу йўналишда анча илгарилаган OPPO, Vivo, OnePlus брендлари эса рўйхатда 9, 11 ва 14-поғоналарни банд этишмоқда. Эслатиб ўтамиз, рўйхатнинг биринчи йигирматалигида Smartisan ва Xiaolajiao (Little Pepper) компанияларидан ташқари барча брендлар жаҳон бозорига яхши таниш. Агар Smartisan сўнгги бир йил ичида бирорта ҳам янги моделни тақдим қилмаган бўлса, Xiaolajiao (Little Pepper) фақат Хитой бозори учун арзон аппаратлар ишлаб чиқаради.
Энди офлайн сотувлар тўғрисида гапирсак. Хитойда офлайн савдоларда BBK компанияси яққол етакчиликни қўлдан бой бермай келяпти. Унинг OPPO ва Vivo брендлари рўйхатда биринчи ва учинчи ўринларни банд этишмоқда. Иккинчи ўринда Huawei, тўртинчи ўринда эса Apple жой эгаллаган. Бешинчи ўринни эса Apple‘дан катта фарқ билан ортда қолган Жанубий Кореянинг Samsung компанияси банд этган. Xiaomi ҳақида гапирадиган бўлсак, офлайн савдода у тўққизинчи ўринда, чунки компания асосан онлайн савдога эътибор қаратади. Рейтингнинг қуйи қисмида кўпчиликка яхши таниш бўлмаган Lephone, Hisense, Koobee, Kopo ва Doov каби брендлар ҳам мавжуд, аммо уларнинг аксарият қурилмалари арзон модель ҳисобланиб, асосий сегмент харидорларининг диққатини жалб этмайди. Бу туркумга CMCC (ушбу қисқартма билан China Mobile остидаги қурилмалар сотилади) телефонларини ҳам киритиш мумкин.
Мана, энди умумий рейтинг билан танишсак. Умумий рейтингни онлайн ва офлайн савдоларда етакчилардан бўлган Huawei бошқармоқда. Иккинчи ва тўртинчи ўринларни, асосан, офлайн режимда сотиладиган OPPO ва Vivo банд этган. Аввалги рейтингларда тўртинчи ўринни эгаллаган Apple якуний рейтингда учинчи ўринга кўтарилган. Xiaomi эса бешинчи ўринда келмоқда. Бунга сабаб компания офлайн савдода яхши натижа кўрсата олмаганидир. Офлайн савдога урғу берадиган кичик компаниялар ҳам умумий рейтингдан жой олишган (Lephone, Hisense, Koobee, Kopo).
