Galaxy Note7’даги носозлик Samsung’га бир миллиард долларга тушиши мумкин
Шу йилнинг август ойида тақдим этилган ва кўпчиликнинг ҳайратига сабаб бўлган Galaxy Note7 фаблетида кутилмаган носозликнинг юзага келганлиги ва Samsung мазкур моделдаги телефонларни қайтариб олаётгани ҳақида аввалроқ хабар берган эдик.
Ҳозиргача жаҳон миқёсида фаблетнинг батареясидаги носозлик туфайли ёниб кетганлиги билан боғлиқ бир нечта ҳолат қайд этилган. Бироқ Жанубий Кореялик гигант фойдаланувчилар саломатлигини ўйлаб, мазкур моделдаги смартфонларни алмаштириб бермоқда. Албатта, бу нарса таҳсинга лойиқ. Аммо компаниянинг бошқа чораси ҳам йўқ, менимча. Сабаби бундай носозлик бренд мавқеига жуда кучли зарба бериши мумкин.
Шубҳасиз, Galaxy Note7 смартфонларини алмаштириш компанияга жуда қимматга тушиши табиий. Credit Suisse Group AG, Daishin Securities Co. ва Pelham Smithers Associates консалтинг агентликларининг берган маълумотларига қарайдиган бўлсак, фаблетни бошқа қурилмага алмаштириш компанияга 1 миллард долларга тушиши мумкин.
Бунда ҳар бир смартфоннинг нархи ва компаниянинг унинг сотувидан оладиган фойдаси (ўртача 900 АҚШ доллари) ҳисобга олинган. Samsung’нинг мобил қурималар бўлимининг бошлиғи Кох Донг Чжин ўтган жума куни Сеул шаҳрида ўтказилган конференцияда ушбу суммани “бағоятда катта” деб изоҳлаган.
Credit Suisse ахборотига кўра, компания ҳар бир сотилган Galaxy Note7 телефонидан ўртача 108 доллар даромад қилишни ва йил охиригача тахминан 8-9 миллион дона фаблет сотишни режалаштирган эди. Ушбу кўрсаткичлар компанияга 900 миллион доллар атрофида фойда келтириши кўзда тутилган эди. Бироқ оёқ тагидан чиққан кутилмаган носозлик ушбу режанинг бажарилишига тўсқинлик қилмоқда. Шунинг учун Samsung бу йил мазкур модель сотувидан бир чақа ҳам фойда олмаслиги анча эҳтимолга яқин.
Албатта, 1 млрд доллар жуда катта харажат. Аммо бу компаниянинг оладиган йиллик фойдасининг 5%ни (Samsung бир йилда тахминан 20,6 млрд доллар соф фойда кўради) ташкил қилади, холос.
