Бугун тақдим этиладиган iPhone 7 нималарни ваъда қилмоқда?

Бугун тақдим этиладиган iPhone 7 нималарни ваъда қилмоқда?

 

Бугун – 2016 йилнинг 7 сентябрь куни, Тошкент вақти билан тахминан 22:00 да  Apple Сан-Францискодаги Билл Граҳам Сивик Анжуманлар залида “7” рақамига эга янги iPhone моделини  намойиш қилади. iPhone 7 ҳамда унинг йирикроқ — iPhone 7 Plus талқини “аждодлари”дан фарқ қилувчи ультраюпқа кўринишдаги дизайнга ва бошқа илғор устунликларга эга бўлади. Шунингдек, iPhone 7 аввалги айфонлар аккумуляторидан 12,5% га кўпроқ қувват сиғимига эга “қувват тоши” билан таъминланади. Унга янгича — илғорлашган 12 мегапикселли камера ўрнатилади. Интернет тармоғида янги айфон ҳақидаги миш-мишлар, тахмин ва мулоҳазалар болалаб кетди. Кечда – ҳаммасига ойдинлик киритилгунига қадар сизнинг эътиборингизга улар орасидаги энг ишончли манбаалардан олинган маълумотларни тақдим этамиз.

iPhone7

Ўлчам ва дизайн

Айфон қурилмасига хос ҳар бир янги концепция эътиборни тортган. Жумладан, тасдиқланмаган фотосурат ва видеолардан кўриш мумкинки, iPhone 7 дизайни ва платформа ечими ҳам ўзига хос.

Базавий талқин ўлчамлари: 138,30×67,12×7,1 мм, iPhone 7 Plus – 158,22×77,94×7,3 мм. iPhone 6s ҳамда 6s Plus ўлчамлари миллиметригача бир хил эди. Янги айфонда эса бу жиҳат фарқли. Камера атрофидаги металл ҳалқа йўқолганини ҳисобга олмаса, қурилма дизайни ўзгармаган.  Яхши бир янгилик: смартфон корпуси унинг сувга бардошли эканини тасдиқлайдиган IP68 сертификатига эга бўлади.

Флагман экрани атрофи 2,5D туридаги ҳимоя ва безак шишасига эга бўлади. Натижада, уни ягона қўлда бошқариш осон бўлади. Apple компанияси iPhone 7’да 3,5 мм аудио портни олиб ташлаши ҳақидаги хабар деярли ўз исботини топган. Смартфон космик кулранг, кумуш, тилла, пушти-тилла ранг корпус талқинларида ишлаб чиқарилади.

iPhone7

Платформа ва самарадорлик

Ойнинг еттинчи куни тақдим этилаётган iPhone 4 ядроли 64 битли A10 процессорига эга бўлади. Унинг частота тезлиги 14 нанометрли техник жараёнда амалга ошувчи 2,4 ГГц. Apple процессорлари ядроси 8 ёки частота тезлиги бундан 2 марта катта бўлган частотага эга бўлган смартфонлардан ҳам тезроқ ишлаш қобилиятига эга. Боиси, компания платформа таъминот дастурларини операцион тизими таъминот дастурлари билан оптималлаштиришга катта эътибор қаратади. Айфон процессордаги 14 нанометрли техник жараён унинг самарадорлигини янада оширади. Шу билан бирга, бу технология процессорнинг қизиб кетмаслиги ҳамда частота тезлигини кўтармасдан туриб энерготежамкорлигини таъминлайди. Натижада, биз янада тезкор платформа тизими фаолиятига гувоҳ бўламиз.  Бу борада iPhone 6S билан фарқ сезиларли даражада юқори бўлади.

Баъзи манбааларда, FinFET-транзисторлари ва InFO (Integrated Fan-Out) технологиясига эга совутиш тизимига эга процессор платформаси самарадорлигини 20% га ошириши ҳам ёзилмоқда.

Айфон 7 оператив хотираси iPhone 6S’ники каби – 2 ГБ бўлади. Тўғри, Андроидлар 3-4 ГБ тезкор хотирага эга бўлаётган бир вақтда, айфоннинг бу қарори бир оз ажабланарли бўлиши мумкин. Лекин, дастурий таъминот тизими аппарат таъминоти, яъни платформа тизими билан қанчалик номувофиқ келса, компаниялар самарадорликни айнан тезкор хотира сиғимини кўтариш орқали кўтарадилар. Айтиб ўтганимиздек, “Олма” смартфони бу камчиликка эга эмас. Унинг ички ва ташқи илова-дастурлари ўзаро уйғун. Маълум қилинишича, iPhone 7 Plus флагманида 3 ГБ тезкор хотира мавжуд бўлади.

iPhone 7 смартфони 32 ГБ, 64 ГБ ва 128 ГБ ҳажмли доимий ички хотирага эга бўлади. iPhone 7 модели ва талқинидан келиб чиқиб, iOS 10 операцион тизими бошқарувида фаолият кўрсатади. Бу эса унинг аккумулятор фаолиятини узайтириб, янада самарали ишлашига хизмат қилади.

iPhone7

Дисплей

iPhone 7 Plus телефони iPhone 6s каби 5,5 дюймли, Retina HD – экранга, iPhone 7 флагмани 4,7 дюймли экранга эга бўлади.

Apple йирик дисплейли смартфонлар ишлаб чиқаришни  корпорация раҳбари Стив Жобс тириклигидаёқ тажриба сифатида синаб кўраётган эди. Шундан бошлаб смартфон экранлари ўсишда давом этмоқда. Экспертлар сўнгги айфон — “SE”да iPhone 6s’да мавжуд 3D Touch технологиясининг жорий қилинмаганини қаттиқ танқид остига олишган эди. iPhone 7 дисплейида эса 3D Touch технологияси татбиқ этилади. Яъни, сенсор дисплей билан бармоқ зарбининг даражаси ёрдамида алоқага киришиш мумкин.

iPhone 7 концепциясига кўра, унинг дисплейида фойдаланувчи шахсини аниқлайдиган Touch ID тизимининг датчиги ўрнатилган бўлади.

Баъзи маълумотларга қараганда, янги айфонда янги “Sonovation” технологияси синаб кўрилади. Ушбу технология  “Sonovation” компанияси маҳсулоти бўлиб,  энди бармоқ излари сканери iPhone ҳамда iPad’нинг дисплейидан ўрин олади. Яъни, энди муайян жойни эмас, дисплейнинг хоҳлаган нуқтасига бармоқни теккизиш орқали смартфон ёки планшетнинг текширув тизимидан ўтиш мумкин. Айнан шу технология iPhone 7’га “Home” бош тугмасидан халос бўлиш имкониятини беради.

iPhone7

Камера

“7” рақамли айфон камераси смартфон бозорида рақобатга дош бериши мақсадида, унинг сезиларли  даражада илғорлашгани айтилмоқда. iPhone 6S каби унинг сиғими ҳам 12 мегапикселли. Янги гаджет ҳам ёруғлик паст шароитда яхши видео тасвир олиш имконига эга Quad Full HD технологияси билан таъминланган. Quad Full HD технологиясининг ўзига хос жиҳати сифатида iPhone 7’нинг 4К сиғимли видео тасвирга олиш кўникмаси эътироф этилмоқда. Ҳа, унинг ёрдамида 3840×2160 пиксель сиғимли, ҳар секундда 60 кадр частотали видео ёзиб олишингиз мумкин. “Ақлли телефон”нинг 5 МП олд камераси ҳам ушбу технология билан таъминланган. Яъни, у ҳам секундига частота тезлиги 60 кадр, сиғими 2 МП бўлган видео тасвир ёза олади.

iPhone 7 Plus эса қўш бош камерага эга бўлади. Икки матрица ва 2 объектив ягона тизимга бириктирилган. Экспертларнинг айтишича, кучли фокуслаш тизимига эга камераларда олинган суратлар сифати профессионал камераларникидан қолишмайди.

12 мегапикселли матрица устидаги объектив суратни оптик барқарорлаштириш тизимига эга бўлади. Бошқа камера эса кучли оптик яқинлаштириш объективига эга. Бу эса олинган суратнинг деталларга бой бўлишини таъминлайди. Олд камера 5 МП, f/2.2 диафрагмага эга.

Экспертларнинг айтишича, кучли фокуслаш тизимига эга камераларда олинган суратлар сифати профессионал камераларникидан қолишмайди.

iPhone7

Интерфейс

Янги iPhone 7 смартфонидаги яна бир ўзига хосликнинг eSIM технологияси бўлиши кутилмоқда. Бу технология ягона электрон сим-картадан фойдаланиш ва жисмоний сим-картадан воз кечишни таклиф қилади. Фойдаланувчиларнинг смартфонга бирор нима ўрнатишларига ҳожат қолмайди. Боиси, у ерда Apple’нинг ўзининг электрон сим-картаси бўлади.

Шу билан бирга, айни пайтда симсиз қувват олдириш технологияси ҳам ривожланмоқда. Навбатдаги iPhone 7 гаджетининг ҳам бу муҳим жиҳатга эга бўлиши айтилмоқда. Агар Apple симсиз қувватлаш технологиясини ўрнатса, натижада компания қурилмадаги Lightning коннекторидан воз кечилади. Бу эса корпус дизайни ва бошқа имконият учун айни муддао.

Хўш, сим-карта, “Home” тугмаси, корпусда порти йўқ қурилмани яратишдан мақсад нима? Агар биз бу учала туйнукнинг ҳам смартфон ичкарисига сув ўтказиши мумкинлигини ҳисобга олсак, унда компания сув таъсирига бардошли корпус устида бош қотираётган кўринади. Шу билан бирга, iPhone 7 янада юпқа корпус, кенг дисплейга эга бўлади.

Илғор айфон коммуникация имкониятлари ҳам юқори: GSM, CDMA, EDGE (2G), UMTS (3G), LTE (4G), Wi-Fi, Bluetooth 4.2, NFC.

iPhone7

Нарх-наво

Купертинолик “Олма” бу гал нарх-наво масаласида бир оз харидорлар фойдасига ён берган кўринади. 2015 йилда Apple компанияси iPhone 6S нархини оширмади. Гарчи, янги флагман смартфонда нисбатан қиммат ва юқори сифатли деталлардан фойдаланилган бўлса ҳам.

Шу тахлит, айфон 7 гаджетининг тахминий энг паст нархи 650 АҚШ доллари бўлиши кутилмоқда. Бу – 32 ГБ модель нархи, шунингдек, 64 ГБ талқин 750 доллар, ҳамда 128 ГБ доимий хотирага эга талқиннинг 850 доллардан сотилиши кутилмоқда.

Таҳлилчилар 2016 йилнинг охирига қадар Apple’нинг жами 65 млн дона смартфон сотишини тахмин қилишмоқда. Бу эса 2015 йилнинг шу даврида сотилган iPhone 6s смартфони миқдори – 82 миллион донадан анча кам.

Бугун тақдим этилиши кутилаётган Айфон 7’нинг юқоридаги тавсифи жаҳоннинг таниқли TechCrunch, The Verge ва CNET ахборот технологиялари нашрлари тақдим этган, компания томонидан тасдиқланмаган маълумотлар асосида тайёрланган. У қисман компания бугун маълум қиладиган маълумотлардан фарқ қилиши мумкин. Бизни кузатишда давом этинг.