iPhone 7 расман тақдим қилинди
Бир неча дақиқалар олдин Apple Сан-Францискодаги Билл Граҳам Сивик Анжуманлар залида “7” рақамига эга янги iPhone моделини намойиш қилди. iPhone 7 ҳамда унинг йирикроқ — iPhone 7 Plus талқини бир қатор илғор жиҳатларга эга.
“Хайрли тонг!” дея саҳнага чиқиб келган Тим Кук барчага миннатдорчилик билдирди. У сўзи аввалида Apple Music тизимининг 17 миллион обуначилари борлигини маълум қилди. App Store’да 140 млрд илова, шулардан 500 мингтаси ўйин эканлигини, энди айфон фойдаланувчилари афсонавий Mario ўйинини ҳам ўйнашлари мумкинлигини маълум қилди. Super Mario Run ўйини ҳақида маълумот бериш учун саҳнага Миёмота Сан таклиф этилди.
“Ақлли соат”, янги операцион тизим, янги турдаги симсиз қулоқчинлардан сўнг ниҳоят навбат янги айфонга етиб келди.
Тақдимот “Айфон бу – смартфонларнинг олтин стандарти”, деган жумла билан бошланди.
“Биз 1 млрд.дан зиёд айфон сотдик, Ернинг ҳар 6 кишисидан бири айфон фойдаланувчиси. iPhone 7 биз шу вақтга қадар яратган айфонларнинг энг яхшисидир”.
Гапни қисқа қиламиз …
Шундай қилиб, 4,7 дюймли iPhone 7 ва 5,5 дюймли iPhone 7 Plus тақдим қилинди.
Кўринишидан жозибали ва мислсиз дизайн, алюминий корпус ва шиша уйғунлиги, силлиқ дизайн ва сайқалланган металл навбатдаги айфоннинг ташқи ҳашамдорлигини оширган.
iPhone 7 қора, кўмир-қора (қора-оникс – ялтироқ тусли), тилларанг, кумушранг ва пушти-тилларанг корпусли талқинларда ишлаб чиқарилади.
Корпус орқасидаги тарам-тарам антеннанинг пластик улоқлари энди деярли кўринмайди. Улар томга яқин жойдан ўрин олган. Корпуснинг орқа панели шиша уйғунлигида тақдим қилинган.
Металл ва алюминий уйғунлигидаги корпус 3 ўлчамли сайқаллаш жараёнидан ўтказилган. Шундан сўнг алюминийни ранг билан тўйинтириш учу унга кислород орқали ишлов берилган. Орқа панелга эса зангламайдиган пўлатдан тайёрланган Apple логотипи ўрнатилган.
Энг муҳим хусусиятлардан бири, шубҳасизки, iPhone 7 смартфонининг IP67 стандартини олгани, яъни чанг ва сув таъсирига бардошли корпусга эга бўлгани бўлди.
3,5 мм аудио жек чиндан ҳам янги айфон корпусида мавжуд эмас. Энди аудио қулоқчинни телефонга корпусдаги Lightning порти ва махсус адаптер ёрдамида улаймиз. Шу билан бирга, “энг кучли айфон” корпусининг қуйи ва том қисмида илғор стереодинамикаларга эга бўлгани ҳам инновацион янгилик бўлди. Бу орқали унинг овози 2 маротабага баландлашган.
iPhone 7 ҳам “аждодлари” каби HD сиғимли Retina экранга эга бўлган. Мисоли, ҳамёнбоп смартфонлар каби. Бу кўпчиликни хафа қилиши тайин.
Экран сиғими эса аввалги айфонларникидан фарқ қилмайди. Фақатгина унинг ёрқинлиги 25 фоизга ошганлиги тақдимотда қайд этилди. Apple тақдим этган янги смартфон авлоди 32, 128 ҳамда 256 Гб ҳажмли доимий ички хотираларда сотувга чиқарилади.
iPhone 7 Plus’да эса iPhone 6s ҳамда 6s Plus билан солиштирганда, қувват самарадорлиги 1 соатга ошган. Бу Apple учун рекорд кўрсаткич.
iPhone 7’нинг юраги бўлмиш A10 Fusion процессори тақдимотда смартфон тарихидаги энг кучли процессор деб эълон қилинди. Тўрт ядроли, 64 битли процессорнинг 2 ядроси ўйин ёки видеони, қолган 2 таси бошқа вазифаларга масъул. Бу процессор ёрдамида смартфонда ўйинларни видеоўйин приставкасида ўйнагандай сифатли ва ёрқин рангларда ўйнаш мумкинлиги маълум қилинди.
Юқоридаги суратда кўриб турганингиздек, симсиз аудио тинглаганда тўла қувват iPhone 7’га 40 соатга етса, iPhone 7 Plus’га 60 соатга етади. 3G тармоқдаги суҳбатда эса тўла қувватланган Айфон 7’да 14 соат, унинг “акаси”да 21 соат суҳбат қуриш мумкин.
Apple A10 Fusion олдинги A9 процессоридан 40% тезроқ ишлайди. Унда видеокарта самарадорлиги ҳам 50%га кўтарилган. Аккумуляторнинг ишлаш вақти iPhone 7’да 2 соатга чўзилган.
iPhone 7 аппаратининг бош модели 12 мегапикселли камерага эга бўлди. iPhone 7 Plus худди шу сиғимли 2 та бош камер объективи билан таъминланган. Қўш камералардан бири кенг бурчакли сурат олса, бошқаси фокусни ўрнатадиган телеобъектив вазифасини бажаради.
Бош камера 12 МП, олд камера модулининг сиғими 7 МП. Ҳар иккала камералар f/1.8 диафрагмага эга. Бош камера объективида 6 та линза ўрнатилган. Энди фоточақноқ 2 эмас, 4 та диодли бўлди, яъни қоронғу шароитда суратлар энди янада ёрқин. iPhone 7 Plus’да олд камерада барқарорлаштириш тизими ўрнатилган.
Шунингдек, камералар учун суратни қайта ишлайдиган алоҳида процессор ҳам ўрнатилган. Автофокус тизимининг аниқ ва ёрқин ишлаши камерага юқори сифатли суратлар олиш имконини беради.
iPhone 7 Plus камерасидаги 2-модулда объектни 10 мартагача яқинлаштириш мумкин бўлган “рақамли зум” технологияси татбиқ этилган. Шу билан бирга, сурат сифати сақлаб қолинади.
Иккинчи модуль кенг бурчакли панорамалар олишга хизмат қилади. Камера оптик барқарорлаштириш тизими, оптик яқинлаштириш функциясига эга бўлди.
Янги айфон аввалги — iPhone 6s’га қараганда 60%га тезроқ ишлаб, 30% сифатлироқ сурат олади.
Янги iPhone жорий йилнинг июнь ойида тақдим этилган iOS 10 операцион тизими бошқарувида фаолият кўрсатади. Унинг такомиллашган жиҳатлари сифатида Siri виртуал ёрдамчиси ва қўшимча иловаларни, Messages ва Maps иловаларининг янги талқини, уйдаги “ақлли” буюмларни бошқаришга мўлжалланган HomeKit дастурини, фойдаланувчининг кейинги айтмоқчи бўлган сўзини топадиган сунъий интеллектга эга клавиатурани эътироф этиш мумкин.
Шу билан бирга, тақдимотда AirPods симсиз қулоқчинлари ҳам тақдим қилинди.
Қулоққа осон жойлашадиган мўъжаз гаджет iPhone ва Watch билан чиқиша олади ва улар ёрдамида гаджетни бошқариш мумкин. Уларда узлуксиз 5 соат мусиқа тинглаш мумкин.
Смартфонлар LTE алоқа тармоғининг 25 диапазонида фаолият кўрсатадилар. Уларнинг уланиш тезлиги LTE Адвансед технологияси ёрдамида 450 Мбит/с.ни ташкил қилади. Бу iPhone 6’дан 3 маротаба тезкор дегани.
Қолган коммуникация жиҳатлари аввалги айфонларники билан ир хил: GPS ва A-GPS, Bluetooth 4.2, NFC, 2 диапазонли Wi-Fi.
iPhone 7 ҳамда 7 Plus’да ўрнатилган лазерли датчик уни масофадан туриб ишоралар билан бошқариш имконини беради. Мисол учун, мой ёки лой бўлган қўл орқали ҳам бошқариш мумкин.
Янги айфон экрани кутилганидек 3D Touch технологиясига эга бўлди. Янги айфоннинг Home тугмасида эса Force Touch технологияси татбиқ қилинган бўлиб, у бармоқ зарбининг даражасига кўра фаолият кўрсатади.
iPhone 7 ҳамда 7 Plus қутисида гаджетлар билан бирга EarPods наушниклари, Lightning портига улаш адаптери, Lightning-USB қувватлаш кабели ва қўлланма мавжуд бўлади.
iPhone 7 ва 7 Plus смартфон бозорига 16 сентябрдан сотувга чиқарилади. iPhone 7’нинг оддий талқини 649 АҚШ долларидан сотилади. У 32, 128 ҳамда 256 ГБ доимий хотира талқинларида бўлади.
iPhone 7 Plus эса сотувга $769 доллардан чиқарилади.
Симсиз AirPods наушниклари эса октябрь ойида $159 доллардан бозорга чиқарилади.
Шунингдек, сув ўтказмайдиган корпусга эга, 2 ядроли ва аввалги Apple Watch’дан 2 маротаба тезроқ ишлайдиган Apple Watch Series 2 яъни янги Apple Watch соати $370, унинг янгилаган тизим билан таъминланган аввалги талқини янгиланган тизимга эга, $270 доллардан сотувга чиқарилади.
Тақдимотда Pokemon Go ўйинини энди янги Apple Watch’да ўйнаш, яқин ойлар ичида App Store’дан Super Mario Run ўйинини юклаб олиш мумкинлиги ҳам эълон қилинди.
