iPhone 7’да кутилган, аммо татбиқ этилмаган 7 та янгилик

iPhone 7’да кутилган, аммо татбиқ этилмаган 7 та янгилик

Хабарингиз бор, 7-сентябрь куни Apple компанияси Сан-Франциско (АҚШ, Калифорния) шаҳрида iPhone 7 ва iPhone 7 Plus смартфонларини жаҳонга намойиш этди. Қуйида ушбу смартфонларга татбиқ этилиши кутилган, бироқ қўлланманган 7 та янгилик ҳақида сўз юритамиз. Бошладик.

  1. USB Type C. Apple янги смартфонларда 3,5 миллиметрли аудио уядан воз кечди-ю, айни пайтда жадаллик билан янги қурилмаларга қўлланилаётган USB Type C стандартидан фойдаланишни унутди. Жуда қизиқ, аммо компания ўзининг 12-дюймли Macbook’ларига мазкур стандартни татбиқ этган. Машҳур рус блогери Евгений Вильяевнинг ёзишича, агар мазкур технология компания томонидан янги смартфонларда ишлатилгандан эди, унинг жаҳондаги универсаллиги янада ошган бўларди.
  2. Экран аниқлигининг кучайиши. Аввалроқ “олма” мухлислари томонидан янги iPhone 7 камида FHD,  iPhone 7 Plus эса 2К (QHD) экранга эга бўлиши тахмин қилинаётган эди. Аммо купертинолик гигант негадир бу йил ҳам экраннинг аниқлик даражасини оширишни орқага сурди. Янги гаджетлар ҳам анчадан бери қадрдон HD дисплейга эга бўлди. Android смартфонлар бозорида бундай аниқликдаги экран аллақачон ўрта сегментдаги арзон телефонларга қўлланиладиган бўлган.
  3. Тезкор ва симсиз зарядлаш. Унчалик катта бўлмаган батареяга эга iPhoneтўлиқ қувватланиш учун 2 соат атрофида вақт сарфлайди. Албатта, бугунги кундаги смартфонларда ишлатилаётган технологиялар замонида бу нарса бироз ғалати туюлади. Ахир, бошқа ишлаб чиқарувчилар зарядлаш вақтини сезиларли даражада қисқартиришга эришиб, ҳатто симсиз қувватлаш имкониятини ҳам тақдим этишмоқда. Аммо “олма” бу гал ҳам шошилмасликка қарор қилган кўринади.
  4. Кўк рангли корпус. Олдинроқ тармоқда Apple тим кўк рангли iPhone7 версиясини ишлаб чиқариши тўғрисида миш-мишлар пайдо бўлган эди. Албатта, бу хабарлар ўз-ўзидан тарқалмайди: улар мухлисларнинг хоҳишини ифода этади. Аммо кутилганидек бўлмади. Компания икки хил қора ранг вариантидаги смартфонларни таклиф этди.
  5. Иккита SIM-карта. Адашмасак, iPhone 4s давридан бошлаб “олма” ихлосмандлари иккита SIM-картали iPhone’ни кутишмоқда. Бироқ компания иккинчи картага телефонда жой ажратмади. Баъзи тасдиқланмаган хабарларга кўра, компания иккинчи SIM-картадан кўра, Apple SIM технологияси устида иш олиб бормоқда экан. Чиндан-да шундай бўлса, унда купертинолик гигантнинг ушбу қарорини қўллаб-қувватлаш мумкин.
  6. AMOLED-дисплей. Бу галги янги iPhone’ларда ниҳоят Apple янги технологиядаги AMOLED дисплейларига ўтиши тўғрисида жуда кўп хабарлар ёзилган эди. Сабаби бундай экранларда ранглар табиий колоритларга анча яқин, шунингдек, қувват сарфи ҳам бошқа матрица турларига солиштирганда анча камроқ. Бироқ компания HD Retina экранларига бу сафар ҳам содиқ қолди.
  7. Home тугмасидан воз кечиш. Тармоқда кузатилган айрим прогнозларда янги iPhone’ларда Home тугмасидан воз кечилиши, бармоқ изи сканери эса бевосита экраннинг ўзига ўтказилиши ҳақида сўз юритилган эди. Аммо компания бунинг ўрнига Home тугмасини бироз такомиллаштириб қўя қолди. Мутахассисларнинг фикрича, бу тўғри қарор. Чунки бармоқ изи сканерини экранга жойлаштириш гаджетдан фойдаланганда айрим ноқулайликларни келтириб чиқариши мумкин экан.

Мана, юқорида кўпчилик томонидан янги iPhone’ларда қўлланилиши кутилган бир нечта янгиликларни санаб ўтдик. Тўғрисини айтганда, бу галги “олма” инновациялари унчалик янгиликларга бой бўлмади. Уларнинг айрим жиҳатларда орқада эканлиги ҳам қайд этилмоқда. Нима ҳам дердик, смартфонлар яратувчиси ва бозорда янги трендлар муаллифи бўлган бундай компаниядан, очиғи, мухлислар янада оламшумул инновацияларн  кутган эди.

Terabayt.uz сайтининг видеолари: Youtube'даги каналимизда!