iPhone эволюцияси: 2G’дан iPhone 7’га қадар

iPhone эволюцияси: 2G’дан iPhone 7’га қадар

Айфоннинг бу кунга етиб келиши учун узоқ йиллар, тоғдай сабр-тоқат ва имконсизликларни инкор қилган илғор ғоялар керак бўлди. Стив Жобс www.iphone.org доменини 1999 йилда рўйхатдан ўтказиб қўйган бўлса, илк айфоннинг тақдим этилиши учун 8 йил керак бўлди.

Куни кеча тақдим қилинган Apple Inc.’нинг янги iPhone 7 телефон аппарати улкан техник ўзгаришларга эга бўлмаган бўлса ҳам, унинг муҳим жиҳати сифатида думалоқ аудио коннектордан маҳрум бўлганини айтиш мумкин. Қайсидир маънода, тақдимотда қайд этилганидек, iPhone деган ном смартфон бозорининг олтин стандартларини бузиб, тузадиган салобатга эга. Унинг ривожи инсонлар ҳаётининг қулайлигини ифодалайди.

Илк iPhone аппаратининг бўйи 115,5, эни 61 см, корпус қалинлиги 11,6 мм бўлган бўлса, сўнгги – iPhone 7’да бу кўрсаткич 138 х 67 х 7.1 мм.ни ташкил этди. Йиллар давомида ўзгариб борган мана шу ўлчам ва тафовут ўртасида илғор ғоя ҳамда юксалишлар мужассам.

Мобиль алоқа бозорининг мутлақ “эга”ларидан бири бўлиб келган iPhone смартфони Apple’ни жаҳоннинг энг қиммат компаниясига айлантирган. Бу илғор қурилма жаҳоннинг мана ман деган телефон ишлаб чиқарувчиларини рақобатда синдириб, хонавайрон қилган. Бу жабрдийдалар қаторида BlackBerry’дан тортиб Nokia ҳам бор. Биз қуйида афйон аппаратларининг ривожланиш босқичларига назар соламиз.

iPhone 2G

Смартфон эрасини бошлаб берган илк iPhone ёки iPhone 2G — сенсорли  смартфон 2007 йилнинг 9 январида Стив Жобс томонидан тақдим қилинган. У 29 июндан бошлаб савдога чиқарилган.

“Мен бу кунни 2,5 йил мобайнида сабрсизлик билан кутдим. Бугун Apple сизга телефон қандай бўлиши кераклигини намойиш қилади”, деган эди компания асосчиси ўз чиқишида. Шишали мультитач-дисплей, клавишлардан холи экранли илк айфонни олиш истагида минглаб одамлар бир неча кун давомида навбатда туришади.

2G модели алюминий орқа панель, аппаратнинг қуйи қисмида GSM-приёмник ва Wi-Fi/ Bluetooth антенна линиясини ёпиб турувчи пластик улоқ, ўзида телефон ва плеер, компьютер имкониятларини жамлагани билан ўзига хос эди. Бироқ, камчиликлар ҳам етарли бўлган.

Жумладан, 3G тармоғини қўллаб-қувватламаслиги, BlackBerry’га нисбатан ҳимояланиш даражасининг пастлиги, экраннинг яхши ишламаслиги, кучсиз аккумулятор ва динамик, корпус тирналиши ва бошқалар. Ниҳоят, 2008 йилнинг 18 февралидан бошлаб уни ишлаб чиқариш тўхтатилди.

Apple iPhone

iPhone 3G

2008 йилда тақдим этилган iPhone телефонининг 2-авлодида 3G алоқа тармоғи жорий қилинди.Шунингдек, Google Maps орқали GPS ва A-GPS тизимларидан фойдаланиш, янги операцион тизим, янгиланган дизайн кўпчиликни хурсанд қилган бўлса, пластик корпуснинг дарз кетиши, GSM тизимида алоқа сифатининг пастлиги, WiFi’нинг яхши ишламаслиги, аппаратнинг қизиб кетиши фойдаланувчи таъбини хира қилди. Компания 2008 йилнинг ўзидаёқ уни ишлаб чиқаришни тўхтатди.

iPhone 3GS

iPhone 3GS

iPhone 3GS смартфони 2009 йилда тақдим этилди. Ундаги асосий ўзгариш тезкор фаолият бўлди. 2009 йилнинг 19 июнидан сотувга чиққан 3-авлод айфони аввалгисидан 2 марта тезроқ ишлар эди. “S” қўшимчаси инглиз тилидаги «Speed» – «тезлик» сўзининг қисқартмасидан олинган. iPhone 3GS янги аккумулятор ва процессорга эга бўлди. Айфон 3GS’да сирпанчиқ корпус, процессор қизиши, қувват олишидаги носозликлар асосий муаммолар бўлган.

iPhone 4

iPhone 4

iPhone 4 аппарати 2010 йилнинг кашфиёти ва Apple’нинг илк кескин дизайнга эга бўлган смартфони эди. Эҳтимол, бу ўзгаришлар компания муваффақиятининг ибтидоси бўлган. iPhone 4 «4G»ни қўллаб-қувватламаган. Ундаги асосий муаммолар қаторига, шунингдек, қувват тизимидаги носозлик, алоқанинг йўқолиб қолиши, сирпанчиқ корпусни киритиш мумкин. Лекин, бу авлод айфонида носозликлар анча камайган эди.

iPhone 4S

 iPhone 4S

2011 йилнинг октябрь ойидан сотувга чиқарилган iPhone 4S аввалги айфоннинг такомиллаштирилган талқини. Унинг антеннани ушлаш ва намойиш самарадорлиги анча оширилган эди.

Аммо, чиқиш қўнғироқларида овознинг эшитилмаслиги, қувватнинг тез тугаб қолиши, камера фокусининг ишламаслиги унда кузатилган асосий муаммолар бўлган.

Смартфон корпуси зангламайдиган пўлатдан, бошарув элементлари металлдан тайёрланган. Унинг экран диагонали 3,5 дюймли бўлган.

iPhone 5

iPhone 5

4 дюймли iPhone 5 аппарати ишлаб чиқарувчи учун 2012 йилнинг “омад тумори” бўлди. Apple’нинг йирик экранли илк айфони бозорда оммалашиб, компаниянинг даромадини кескин ошириб юборади. Телефон  iOS 6 операцион тизими бошқарувида фаолият кўрсатган. iPhone 5’нинг илк партияси 1 соатда сотиб тугатилади. Бу ерда гап 2 миллион дона айфон ҳақида кетяпти. Аввалги моделларнинг сотилиши учун эса 22-24 соат зарур бўлган.

Бир қатор таҳлилчиларнинг маълумотига кўра,  iPhone 5 сотувга чиқарилишидан бир ой ўтиб, 10-12 миллион дона сотишга эришилган.

iPhone 5C

iPhone 5C ва 5S

2013 йилда тақдим этилган iPhone 5C аввалги моделнинг “меросхўри” эди. Унда iOS 9 операцион тизими, Apple A6 процессори татбиқ қилинган. Унинг корпуси поликарбонат хомашёсидан тайёрланган.

Қурилма  549—649 доллардан сотувга чиқарилган. Шу йилнинг ўзида Apple 9 млн дона iPhone 5C сотишга муваффақ бўлади. Бу Apple учун смартфон савдоси тарихида рекорд эди.

Бир вақтда тақдим этилган iPhone 5s корпуси эса алюминий металлидан тайёрланган эди. У  iOS 9.3 тизими бошқарувида ишлаган.

Смартфон Apple A7 процессори, Apple M7 видеокарта ҳамда бармоқ излари сканери – Touch ID билан таъминланган эди. У  649—849 доллардан сотувга чиқарилган.

Батафсил: “Малика”даги энг арзон айфон

iPhone 6

iPhone 6 ҳамда 6 Plus

Айфоннинг 8-авлоди бўлмиш iPhone 6 ва 6 Plus телефон аппаратларининг 2014 йилда бўлиб ўтган тақдимоти ўз пайтида қилинган ўринли воқеа бўлди. Технологик мўъжизаларга муҳтож дунё чиндан ҳам мана шундай илғор смартфонга муҳтож эди.

4.7 ҳамда 5.5 дюймли йирик экранли айфонлар Осиё минтақасини “забт этди” ва компания ўзининг Хитойдаги ўрнини мустаҳкамлади. Смартфонлар iOS 8 операцион тизимида фаолият кўрсатган.

Корпусдаги ихчамлик ва мустаҳкамликнинг етишмаслиги боис ўша йилда аппаратга қарши норозиликлар кучайиб кетади. Айниқса, шифокорлар смартфон корпусида одамда аллергия уйғотувчи никель металли соғлик учун зарарлигини маълум қилишади.

iPhone 6S

iPhone 6S

2015 йилнинг сентябрь ойида тақдим этилган iPhone 6S аввалги “аждоди”га қараганда бир оз тезкор ва яхшироқ эди. iOS 9 операцион тизими, бармоқ зарбига қараб фаолият кўрсатадиган 3D Touch технологияси,  2 Гб тезкор хотира, 4К видео суратга олувчи камераси билан олдинги айфонлардан устун эди.

Батафсил: “Малика”даги энг қиммат айфон

iPhone SE

iPhone SE

Жорий йилнинг 21 март куни Apple компанияси томонидан намойиш қилинган IPhone SE билан бирга компания смартфон бозорига iPhone 5S’га хос классик дизайнни ҳам қайтарди. iPhone 5S каби ихчам айфон бугунги рақобатчиларига қараганда бир оз кичик бўлса ҳам, у ўзида сўнгги инновацияларни, жумладан iPhone 6S’га хос имкониятларни жамлаган.

iphone-7

iPhone 7 ҳамда 7 Plus

Яқиндагина, 7 сентябрь куни тақдим этилган iPhone 7 Apple’нинг  сўнгги 2 йилликдаги энг яхши смартфони бўлиши тахмин қилинган эди. Аммо, янги айфонда дизайн ва ташқи кўриниш у қадар ҳам ўзгармаган. У Apple’нинг аввалги телефонларидан сифатли камераси, тезкор ишлаши, 3.5 мм думалоқ шаклдаги аудио бўлмачанинг йўқлиги билан ажралиб туради.

Батафсил: Apple iPhone 7 ва iPhone 7 Plus ҳақида билиш керак бўлган 11 та факт

Сайт янгиликларидан доимий хабардор бўлиш учун Телеграм каналимизга қўшилинг!