Xiaomi Mi TV 3S сериясига 60 дюймли Ultra HD телевизор қўшилди
Бундан бир неча ҳафта олдин Хитойнинг Xiaomi компанияси янги туркумдаги Mi TV 3S номли телевизорлар сериясини намойиш қилгани ҳақида хабар килган эдик. Мазкур серияда Home Theater уй кинотеатри, Mi TV 3S Standart Edition ва базавий модификациядаги Mi TV телевизорларини ўрин олган. Куни кеча Xiaomi Mi TV 3S телевизорлар серияси яна бир 60 дюймли Ultra HD аниқлигидаги экранга эга янги модель билан бойитилди.
4PDA сайтининг хабар беришича, янги 60 дюймли моделга LG томонидан ишлаб чиқарилган IPS матрицали дисплей ўрнатилган, HDR функциясини қўллаб-қувватлайди. Телевизор Mi TV 3S сериясидаги бошқа моделлар сингари юпқа корпус, ингичка рамка ва замонавий дизайнга эга. Унга такт частотаси 1,98 ГГц бўлган Alogic T968 процессори, 2 ГБ тезкор ва 8 ГБ доимий хотира ўрнатилган. Wi-Fi, Bluetooth 4.0, Dolby Audio ва DTS Surround Sound интерфейслари татбиқ этилган.
Телевизорнинг орқа тарафида 3 та HDMI порт, биттадан USB 3.0 ва USB 2.0 ҳамда стандарт AV слот ўрнатилган.
Янги модель $668 нархида сотувга чиқарилди. У сериядаги энг қиммат Home Theatre версиясидан 200 долларга арзонроқдир.
