Tesla ва Panasonic АҚШда қуёш батареяларини ишлаб чиқаради
АҚШнинг Tesla Motors ва Япониянинг Panasonic компаниялари ҳамкорликда Буффало шаҳрида (АҚШ, Нью-Йорк штати) қуёш батареяларини ишлаб чиқаришга келишишди. Келишув шартлари SolarCity компаниясининг Tesla’га қўшилишидан кейин амалга оширилиши режалаштирилган.
The Verge нашрининг ёзишича, ҳамкорлик доирасида Tesla Powerwall ва Powerpack аккумуляторларида ишлатиладиган фотогальваник элемент ва модулларни тайёрлаш белгиланган.
Бу икки йирик компаниянинг ҳамкорликда бажараётган биринчи лойиҳаси эмас. Улар айни пайтда Невада штатидаги (АҚШ) Tesla Gigafactory заводида бошқа турдаги батареяларни ҳам ишлаб чиқаришмоқда. Tesla’нинг техник директори Жей Бининг қайд этишича, агар АҚШ гиганти SolarCity компаниясини харид қилса, у Япониянинг Panasonic фирмаси билан қуёш батареяларини тайёрлашни жадал равишда йўлга қўяди ҳамда жаҳон бозорига арзон ва самарали маҳсулотларни тақдим этади.
Ҳозирча мутахассислар Tesla ва SolarCity компанияларининг бирлашувига ҳеч қандай шубҳа билдиришмаяпти.
