Samsung Galaxy S8 бармоқ изини дисплейда танийдиган биринчи флагман бўлиши мумкин
Хитойнинг Weibo ресурсида анонси кейинги йилнинг биринчи чорагида кутилаётган Samsung Galaxy S8 ҳақида қўшимча тафсилотлар пайдо бўлди. Sammobile сайтининг тармоққа таяниб маълум қилишича, Жанубий Кореялик гигантнинг навбатдаги флагмани тўрт тарафдан қайрилма экранга эга бўлиб, бармоқ изи сканери бевосита экраннинг ўзига жойланиши мумкин.
Бундан аввалроқ ҳам Samsung бармоқ изи сканерини дисплейга интеграциялаши ҳақида турли хабарлар тарқалган эди. Оптик бармоқ изи сканери бармоқ бевосита экранга қўйилганда ишлайди. Ҳозирча бундай технология ҳали биронта смартфонда қўлланмаган.
Тармоқда олдинроқ пайдо бўлган маълумотларга кўра, Samsung Galaxy S8 5,5 дюймли Ultra HD (3840 x 2160 пиксель) аниқлигидаги Super AMOLED экран, VR режим, 10 нанометрли Qualcomm Snapdragon 830 ва Exynos 8895 процессорлари, 6 ёки 8 ГБ оператив хотирага эга бўлиши кутилмоқда. Супер флагманнинг тақдимоти 26 февралда ўтказилиши мумкин.
