Қайси смартфон биринчи Full HD аниқлигидаги экранга эга бўлган?
Гарчи ҳозирда Quad HD (2560×1440 пиксель) форматидаги экранга эга смартфонлар ишлаб чиқарилаётган бўлса-да, кўплаб брендлар ҳалигача Full HD (1920х1080 пиксель) аниқлигидаги дисплейларни афзал кўришмоқда. Бунга сабаб мазкур формат инсоннинг кўриш қобилияти учун талаб этилганидан ҳам етарли миқдорда эканлигидир. Full HD аниқлиги кўплаб дисплейлар учун энг оптимал формат ҳисобланади.
Phonearena нашрининг ёзишича, Full HD (1920х1080 пиксель) форматидаги экран илк маротаба 2012 йилда HTC DROID DNA моделида ишлатилган. Смартфон Gorilla Glass 2 шишаси билан ҳимояланган 5 дюймли экранга эга бўлган. Экраннинг ҳар бир дюйм майдонида 441 пиксель жойланган. Ўша давр учун мазкур дисплей жуда илғор (ҳозирда ҳам ёмон эмас) кўрсаткичларни ўзида мужассамлаштирган.
HTC DROID DNA биринчи бўлиб АҚШнинг Verizon алоқа оператори томонидан сотувга чиқарилган эди.
