Clevo P870X – 64 ГБ оператив хотирага эга ноутбук, бу ҳали ҳаммаси эмас

Ноутбуклар бозорида қиммат ва арзон деган тушунчаларнинг ўзи мавжуд эмас. Сабаби ноутбукнинг нархи, кўп ҳолларда, унинг техник параметрларига боғлиқ бўлади. Мисол учун, Apple, Microsoft ва ASUS компаниялари кучли ноутбуклар ишлаб чиқариши билан яхши танилган.

Бироқ яқинда сотувга чиқарилиши кутилаётган Clevo P870X ноутбуки билан солиштирганда юқоридаги компанияларнинг энг илғор саналган гаджетлари ҳам чумолидай бўлиб кўринади. Нега дейсизми? Унда, келинг, ноутбук билан танишайлик.

IXBT нашрининг ёзишича, Clevo P870X ноутбуки ҳали тақдим этилмаган энг сўнгги Intel Core i7-7770K процессорида ишлайди, унга бир-йўла иккита GeForce GTX 1080 туркумидаги видеокарта ўрнатилган. Дисплейининг диагонали 17,3 дюйм, IPS технологиясида ишланган, аниқлик формати – 3840 х 2160 пиксель (G-Sync технологияси билан).

Ноутбукнинг тезкор хотираси – 64 ГБ, файлларни сақлаш учун 2 ТБли Samsung 960 PRO SSD ва яна иккита ҳар бири 2 ТБ бўлган Samsung 850 PRO SSD кўзда тутилган. Ноутбук бешта USB 3.0, иккита USB-C 3.1, иккита Mini DisplayPort 1.3 портлари, HDMI, Gigabit Ethernet (x2) ва аудиослотлар билан жиҳозланган. Аккумуляторнинг сиғими – 89 Вт/соат. Вазни – 5,5 кг.

Гарчи ноутбук ҳали сотувга чиқарилмаган бўлса-да, Ceg-Hardcorecustom компанияси унинг иккита нусхасини 16 минг доллардан сотишга улгурган.