Chrysler Portal – йўловчилар юзи ва овозини танийдиган электромобиль
Fiat Chrysler Automobiles компанияси бир неча кундан кейин АҚШнинг Лас-Вегас шаҳрида ўтказиладиган CES 2017 кўргазмасида футуристик Chrysler Portal номли электромобилни намойиш қилади, деб хабар бермоқда Engadget сайти.
Модель энг замонавий ахборот-коммуникация технологиялари билан жиҳозланган. Ушбу автомобилга ўрнатиладиган компьютер тизими ҳайдовчи ҳамда йўловчиларнинг юзи ва овозини танишга хизмат қилади. Бу эса муайян фойдаланувчига доир параметрларни (масалан, ўриндиқни тўғрилаш) тезлик билан созлаш имкониятини беради.
Автомобиль ноодатий дизайнга эга, руль вазифасини штурваль бажаради, салонда овозли алоқа функцияси кўзда тутилгани боис овозни кўтармаган ҳолда қўнғироқларга жавоб бериш мумкин. Машинада автопилот тизими мавжуд. Битта тўлиқ зарядда машина тахминан 400 км масофа босиши айтилмоқда.
Нархи ҳозирча номаълум.
