Япониянинг Murata фирмаси Samsung Galaxy S8 учун батарея етказиб беради

Япониянинг Murata фирмаси Samsung Galaxy S8 учун батарея етказиб беради

Жанубий Кореянинг Samsung компанияси навбатдаги флагмани Galaxy S8 модели учун хавфсиз батареялар етказиб бериш бўйича Murata номли япон фирмаси билан ҳамкорлик ўрнатмоқчи, деб хабар бермоқда 3D News Nikkei Asian Review нашрига асосланиб.

Murata Manufacturing 2016 йилда Sony компаниясига қарашли аккумулятор ишлаб чиқариш билан шуғулланадиган бўлимни сотиб олган эди.

Galaxy S8 концептларидан бири

Samsung бир неча ойлик изланишлардан кейин тақдири аянчли якун топган  Galaxy Note 7 моделининг ёниб сабабларини бундан икки ҳафта илгари маълум қилган эди. Ҳисоботга кўра, смартфон Samsung SDI Co.Ltd ва Хитойнинг Amperex Technology Ltd компаниялари томонидан тайёрланган батареялардаги носозлик туфайли ёниб кетишни бошлаган экан. Бунинг натижасида Жанубий Корея гиганти оз эмас, кўп эмас нақ 5,3 млрд доллар операцион зарар кўрган. Шу боисдан ҳам Samsung компанияси Galaxy Note 7 билан содир бўлган нохуш ҳолатлар бошқа такрорланмаслиги учун, батарея сифатига жиддий эътибор билан ёндашадиган брендлар билан ишлаш мақсадида.

Батареяси ёниб кетган Galaxy Note 7

Murata мазкур йўналишда Хитойнинг Amperex Technology Ltd фирмасининг ўрнини босиши кутилмоқда. Бироқ бу борада якуний қарор чиқарилиши Samsung ва япон фирмасининг ўзаро келишувига боғлиқ.

Samsung SDI томонидан Galaxy S5 модели учун чиқарилган батарея

Korea Economic Daily нашрининг қайд этишича, Murata фирмаси Galaxy S8 учун талаб этиладиган жами батареяларнинг 2-8 фоизини етказиб бериш бўйича шартномани қўлга киритиши мумкин.

Эслатиб ўтамиз, Galaxy Note 7 моделини ишлаб чиқариш қурилмадаги жиддий носозлик туфайли Samsung томонидан 2016 йилнинг 11 октябрда расман тўхтатилган эди.  Компаниянинг маълум қилишича, айни вақтда фойдаланишдаги бу телефонларнинг 96 фоизи қайтариб олинган.

Сайт янгиликларидан доимий хабардор бўлиш учун Телеграм каналимизга қўшилинг!