Ноутбук танлашдаги 6 хато

Ноутбук танлашдаги 6 хато

Шубҳасиз, ноутбук танлаш жараёнида йўл қўйилиши мумкин бўлган энг катта хато – рекламага ишонишдир. Шундай бўлса-да, бир қатор бошқа омиллар ҳам йўқ эмас экан. Ferra нашри ноутбук танлаш пайтида кузатиладиган 6 та хатони жамлаб, уларни ўқувчилар эътиборига ҳавола қилди. Демак, қуйида улар билан бирма-бир танишиб чиқамиз. Келгусида ноутбук харид қилиш пайтида улар сизга асқотиши ажаб эмас.

Биринчи хато: аккумуляторнинг узоқ ишлаши ҳақидаги маълумотга ишониш

Одатда, янада енгил ва юпқа ноутбукларни реклама қилиш пайтида, ишлаб чиқарувчилар унинг бир зарядда узоқ вақт ишлаш хусусиятига эга бўлган батареяси ҳақида оғиз кўпиртиришни яхши кўрадилар. Бу гапларга ишонишдан олдин, ҳавола бўйича ўтиб ноутбукнинг автоном ишлаш вақтига оид синов қандай шароитларда ўтказилгани билан танишиб чиқиш тавсия этилади. Реал фойдаланиш ҳолатида экран ёрқинлиги баландроқ созланган бўлади, бунинг устига, ноутбукка бир қанча дастурлар ўрнатилган бўлиши ҳам аниқ. Шу боис ноутбукни танлаш вақтида унинг бир зарядда қанча вақт ишлашига эътибор берган ҳолда, уни реал қўллашдаги ҳолатларни ҳам кўздан қочирманг. Кўпинча ноутбукнинг автоном ишлаш вақтига доир маълумотларни турли форум ва сайтларда ўқиш мумкин.

Иккинчи хато: ноутбукнинг самарали ишлаши ҳақидаги гапларга ишониш

Ноутбукнинг самарали ишлаши ҳақидаги тушунчани турлича талқин қилиш мумкин. Дейлик, компания ўйин ноутбукларини бағоятда самарали ишлайди деб мақтаган вақтда, у ноутбукнинг тез юкланиши, буйруқларга жавоб бериши ва айрими замонавий ўйинларни қўллай олишини назарда тутади. Бироқ, одатда, ўртача график чиплар билан жиҳозланган ноутбуклар ҳам бундай вазифани бемалол уддалаши мумкин. Ноутбукнинг самарали ишлашини унга ўрнатилган процессорлар ва график чиплар, умуман муҳим таркибий қисмларга қараб белгилаш мумкин. Агар сиз оператив хотира, процессор ёки видеокарта турлари ҳақида туайян тушунчага эгаб ўлмасангиз, ноутбукни харид қилишдан олдин улар билан бироз бўлса-да танишиб олинг. Акс ҳолда оддий кундалик ишларни бажариш учун кучли ўйин ноутбукини ёки аксинча, ўйин учун кучсиз техник параметрларга эга бўлган ноутбукни харид қилишингиз ҳеч гап эмас.

Учинчи хато: Intel процессорларининг фақат Core i5, i7 cингари серияларига эътибор қаратиш

Ноутбуклар учун процессорлар ишлаб чиқарадиган энг йирик компаниялардан бири Intel компанияси ҳам айрим пайтларда харидорларнинг адашишига замин яратади. Ҳар бир процессор туркум ва индекс номидан ташкил топган ўзининг код номига эга бўлади. Мисол учун Corei7 номи остида ўйин ноутбукига мўлжалланган процессор ёки юпқа ультрабук учун чиқарилган тежамкор процессор назарда тутилиши ҳам мумкин. Умуман олганда, бу ерда ҳеч ким аслиди бировни алдамайди. Процессор турини индекс номига қараб ажратиш мумкин. Бироқ муаммо шундаки, компания фақат туркум номини келтиради, холос. Эътиборсиз ва содда харидор эса бундай қармоққа илиниши ҳеч гап эмас. Intel Core процессорларининг еттинчи авлоди чиқиши билан Core i5 ва Core i7 туркумларига бир қатор секинроқ ишлайдиган чиплар ҳам киритилди. Хулоса ўзингиздан: ҳар доим процессор индекслари билан танишиб чиқишни унутманг.

Тўртинчи хато: USB Type-C бу ҳар доим тезкор ишлайди деб ҳисоблаш

Айни пайтда смартфонлар саноатида бўлгани каби ноутбуклар бозорида ҳам USB Type-C слоти борган сари қўпроқ қўлланмоқда. Янги стандарт USB 3.0 ўрнини эгалламоқда. Бироқ янги стандартнинг эски стандартдан қанчалик тез ишлашига ҳеч қайси ишлаб чиқарувчи аниқлик киритмайди. Балки у худди USB 3.0 сингари 5 Гбит/сония тезликда маълумотларни кўчирар, ёки 10 Гбит/сония тезликка эгадир? Балки у Thunderbolt 3 интерфейсини қўллаб қувватлайди? Хулоса: хариддан олдин слотларнинг ўтказиш тезлиги билан танишиб чиқинг. Бу нарса ноутбукнинг нархига таъсир қилиши мумин.

Бешинчи хато: совутиш тизимига эътибор бермаслик

Одатда, ўйин ноутбуклари ҳақида гап кетганда, унинг нақадар пухта совутиш тизимига эга эканлиги ҳақидаги гаплар қулоғимизга чалинади. Бироқ реал фойдаланиш жараёнида ушбу тизим қисмларнинг қизиб кетмаслигини кафолатлай олмайди. Агар ноутбук яхши совутиш тизими билан таъминланган бўлса (бу гап айниқса оғир дастурлар ва ўйинларга мўлжалланган ноутбукларга тегишли), унинг кучли процессори ёки видеокартасининг иши кутилган даражада самара бермаслиги мумкин. Шу боис маълум ноутбук моделини харид қилишдан олдин, у ҳақдаги тавсифлар билан таншииб чиқиш зарар қилмайди.

Олтинчи хато: иккита видео карта доим битта видеокартадан яхши

Умуман олганда, иккита видеокартага эга бўлган ноутбук чиндан-да яхши самарадорлик кўрсаткичларини қайд қила олади. Бироқ барча ўйинлар ҳам бир нечта видеокарта билан ишлаш учун оптималлаштирилган бўлмайди. Шунинг учун ўйинга қараб сония ичида кадрларнинг қайта ишланишига гувоҳ бўлишимиз мумкин. Айрим вақтларда бу кўрсаткич баъзи ўйинларда битта видеокартадагидан пастроқ бўлиши ҳам эҳтимолдан холи эмас. Ёки иккита видеокарта битта процессор учун оғирлик қилиши мумкин. Шунинг учун бу мосликка жиддий эътибор бериш фойдадан холи бўлмайди.

Сайт янгиликларидан доимий хабардор бўлиш учун Телеграм каналимизга қўшилинг!