Эксклюзив: «қайта туғилган» Nokia’ни ким ишлаб чиқаради?
Россия бозорларида «қайта туғилган» Nokia телефонларининг илк намуналари пайдо бўлди, деб ёзади Hi-Tech.Mail.Ru. Аниқланишича, гаджетларнинг маълумотларида «ишлаб чиқарувчи» сифатида Nokia номи кўрсатилмаган.
Бунгача Nokia тугмачали телефонларини Microsoft етказиб берар эди. Мазкур бренддан фойдаланиш ҳуқуқини Америка корпорацияси 2014 йилнинг 25 апрелида қўлга киритган ва то 2016 йилнинг 18 майигача ўзида сақлаб турган.
Ўтган йилнинг 13 декабрида эса ушбу афсонавий бренд гаджетнинг қайтарилишидан кейинги илк расмий тақдимотини ўтказди. Лекин бу смартфон эмас, балки тугмачали Nokia 150 бўлиб, унда ўша машҳур «илонча» (Snake Xenzia ўйини) ҳам бор эди.
Кўпчилик кутганидек, Nokia’нинг мазкур маҳсулоти Microsoft’га алоқадор бўлмаган илк қурилмаси бўлиши керак эди. Аммо телефоннинг ҳужжатларида ҳам, қувватлантириш ускунасида ҳам ишлаб чиқарувчи тарифасида Nokia эмас, балки Microsoft кўрсатилган. Маълум бўлишича, у компаниянинг Вьетнамдаги заводида терилган:
Телефон созламаларидан (ўша машҳур *#92702689# комбинацияси орқали) аниқланишича, у 2016 йилнинг октябрида терилган; қутисидаги маълумотга кўра – 2016 йил 29 декабрда заводдан чиққан:
Қурилманинг қувватлантириш ускунасини ҳам Microsoft ишлаб чиқарган, фақат Хитойдаги заводида:
Қуйида янги маҳсулотнинг ўлчамларини «ўлмас» Nokia 3310 билан таққослаб кўришимиз мумкин:
Қисқача тарих: Nokia’нинг мобил қурилмалар бўлинмасини 2014 йил 25 апрелда Microsoft сотиб олган эди. Савдо шартларига кўра, Nokia энди то 2016 йилнинг охирига қадар ўз бренди остида смартфон ишлаб чиқаришга ҳақли эмас эди. Кўп ўтмасдан – 2014 йилнинг охирига бориб Nokia смартфонларида брендни Lumia брендига алмаштириш бошланди, Nokia номи эса телефонларнинг фақат тугмачали моделларидагина қолди.
Microsoft 2016 йил 18 майда Nokia тугмачали телефонлар бизнесини FIH Mobile (Foxconn’га қарашли) ва HMD Global Oy (HDM) компанияларига 350 млн. доллар эвазига 10 йил муддатга сотди. Nokia компаниясининг ўзида смартфон ишлаб чиқаришга етарлича қувват йўқ, шунинг учун ҳам финлар Foxconn билан ўн йиллик шартнома имзолашди. (Эслатиб ўтамиз, Foxconn – Apple’нинг маҳсулотларини терувчи энг йирик шартномачисидир.) Энди янги шартномага кўра, HMD Global Oy компанияси Nokia қурилмаларини бозорда тақдим этади.
Хабарда айтилишича, Hi-Tech.Mail.Ru мутахассислари Nokia 150 қурилмасини синовдан ўтказишни бошлашган ва яқинда унинг тавсифини эълон қилишмоқчи. Улардан биринчилар қаторида хабардор бўлиш учун биз билан қолинг!
