Apple 160 миллион дона iPhone 8 ишлаб чиқаради

Apple 160 миллион дона iPhone 8 ишлаб чиқаради

The Korea Herald нашри томонидан тарқатилган маълумотларга кўра, Apple комппанияси Samsung Display’га ўзининг навбатдаги айфонида фойдаланиши учун яна 60 млн дона 5,5 дюймли OLED туридаги дисплей панелларини буюртма қилган. Маълум бўлишича, бунгача Америкалик ишлаб чиқарувчи кореялик компанияга 100 миллион дона мазкур турдаги панел буюртма қилган. Айни пайтда шартноманинг жами қиймати $11,31 млрд. долларни ташкил этади.

Samsung Display янги iPhone аппаратида фойдаланиладиган дисплейларнинг 80 %ини етказиб беради. Яъни, Samsung Display компанияси Apple’нинг янги OLED экранли смартфонлари учун экран етказиб берувчи пешқадам ишлаб чиқарувчига айланди. Экспертларнинг фикрича, анъанага мувофиқ, Apple навбатдаги айфон моделларини ҳам 200 миллион донадан кам ишлаб чиқармайди.

Жорий йилда фаолиятининг 10 йиллигини юбилей тарзида нишонлашга киришган “Олма” корпорацияси учта янги смартфон тақдим қилмоқчи: 4,7 ва 5,5 дюймли iPhone 7s ҳамда 7s Plus моделлари. Шунингдек, янги iPhone 8 ёки iPhone X. Маълум бўлишича, OLED дисплей фақатгина нархи $1000 долларни ташкил этиши кутилаётган янги айфонда татбиқ этилади. Кўриниб турибдики, компания 160 миллион дона iPhone 8 сотишни режа қилган.

iPhone учун дисплейларни шу вақтга қадар LG Display, Sharp ҳамда Japan Display каби номдор ишлаб чиқарувчилар етказиб беришган. Apple’нинг қарори ҳам OLED экранларнинг LCD’га қараганда илғор эканини исбот қилади. LG Display OLED туридаги дисплейларни асосан йирик диагоналли телевизорлар учун ишлаб чиқармоқда.