“Саккизинчи галактика”ни яқиндан томоша қилинг

“Саккизинчи галактика”ни яқиндан томоша қилинг

Samsung смартфон бозорининг пешқадами сифатида муваффақиятнинг зафарли онларини, шу билан бирга Note 7 туфайли инқирознинг оғир синовини ҳам ҳис қилган компания. Компания тақдимотга тайёрлаётган Galaxy туркумига тегишли навбатдаги Galaxy S8 унинг ахборот технологиялари бозоридаги нуфузини яна қайта тиклаши мумкин. Қуйида эътиборингизга Кореянинг DesignWoOS студияси томонидан Galaxy S8 ҳақидаги маълумотлар асосида ишлаб чиқилган суратлар жамланмасини тақдим этмоқдамиз.

Samsung компанияси ўзининг навбатдаги 5,8 дюймли Galaxy S8 ва 6,2 дюймли Galaxy S8+ флагман смартфонлари истеъмолчилар томонидан илиқ кутиб олинишига ишонмоқда.

The Investor нашрининг ёзишича, янги “байроқдор”нинг илк партияси 17 миллион нусхада ишлаб чиқарилади. Қиёслаш учун айтамиз, Samsung Galaxy S7 ва Galaxy S7 Edge’нинг илк партиясида 12 миллион дона аппарат сотувга чиқарилган.

Galaxy S8 билан бирга унинг қўшимча имкониятларга эга Galaxy S8 Plus талқини ҳам сотувга чиқарилади. Ҳар иккала смартфон Note 7 каби икки ёнга қайрилган букик экранга эга бўлади.

Инсайдерларнинг ёзишларича, Galaxy S8’нинг бармоқ излари сканери унинг орқа панелидан ўрин эгаллайди. Шунингдек, Samsung смартфон ишлаб чиқаришда Apple ва Motorola сиёсатини қўллаб, анъанавий 3,5 мм.ли аудио портдан воз кечиши ҳам кутилмоқда. Аммо, девайснинг тарқалган суратларида бу порт ҳозирча мавжуд. Баъзи экспертлар компания бунга жазм қила олмаслигини айтишмоқда.

Маълумотларга кўра, Samsung камида 60 миллион дона янги флагман сотишни режа қилган. Аввалги флагманлар савдоси 48 миллионни ташкил этган эди. 2014 йилда эса 45 миллион дона флагман сотилган эди.

“Саккизинчи галактика” экранидаги “Home” бош тугмасидан воз кечилиши мумкин. 2560 х 1440 пиксель сиғимига эга бўлади. OLED матрицали экран ишлаб чиқарувчи Samsung Display заводи айни пайтда ҳам Samsung, ҳам Apple учун экран етказиб бермоқда.

Galaxy S8 гаджетининг 29 март куни Нью-Йоркда тақдим этилиши кутилмоқда. Европада  5,8 дюймли Samsung Galaxy S8 гаджети 799 доллардан,  6,2 дюймли талқини 899 евродан сотилиши кутилмоқда. Смартфонлар савдоси 24-30 апрель оралиғида бошланади.

Сайтимизнинг энг чиройли расмларини Инстаграмдаги саҳифамизда томоша қилинг!