Xiaomi ҳамёнбоп Redmi Pro 2’ни тайёрламоқда

Xiaomi компанияси ҳамёнбоп смартфонлар бозори учун яна бир илғор ва арзон гаджетни тайёрламоқда. MiNews нашрининг маълумот беришича, Redmi Pro 2 учун махсус процессор жорий йилнинг иккинчи ярмида тайёр бўлади.

Смартфон жиҳатларига кўра компаниянинг Mi Max девайсини эслатиб юборади. Унга Qualcomm Snapdragon 660 процессори ўрнатилади. Ҳозирча мазкур процессор смартфон бозорининг бирорта гаджетида ўрнатилгани йўқ. Унинг 8 та ядроси бўлиб, 4 та Cortex A73 ядроси 2,2 ГГц частота тезлигида ишлайди. Қолган 4 та ядро учун 1,9 ГГц частота тезлигига эга Cortex A53 масъул. Шу билан бирга, Redmi Pro 2’даги Adreno512 русумли график ядро UFS 2.1 стандартини қўллаб-қувватлайди ва 1866 МГц частотат тезлигида ишлайди. Содда қилиб айтганда, процессор самарали фаолият кўрсатади.

The Wall Street Jouranal нашрининг ёзишича, хитойлик смартфон ишлаб чиқарувчи яқин орада Пекиндаги заводларидан бирида Pinecone номли шахсий процессорларини ишлаб чиқара бошлайди. Мазкур “электрон юрак” илк маротаба навбатдаги флагман — Mi6 гаджетида жорий қилинади. Ҳозирча, Apple, Samsung ва Huawei каби жаҳоннинг йирик технология ишлаб чиқарувчиларигина ўз маҳсулотлари учун процессор ишлаб чиқаришни йўлга қўйишган.