Yoga A12: Lenovo’нинг янги ҳамёнбоп планшет-трансформери

Yoga A12: Lenovo’нинг янги ҳамёнбоп планшет-трансформери

Lenovo Yoga A12 русумли янги планшет-трансформерини компания томонидан бир муддат аввал тақдим қилинган Lenovo Yoga Бук ноутбукининг соддалашган талқини дейиш мумкин. Фарқи ушбу ноутбукнинг сенсор панелида рақамли перо билан тасвир ёки ёзув чизиш функцияси мавжуд эмас.

Эслатиб ўтамиз, Yoga Book — Windows 10 ёки Android операцион тизимида фаолият олиб борувчи ультра юпқа планшет бўлиб, гаджетни “ақлли клавиатура” ёрдамида ноутбукка айлантириш ҳам мумкин. Унинг учун махсус стилус қурилмаси ҳам ишлаб чиқарилган.

Янги А12 Android планшетининг дизайн ва ғоявий элементлари ана шу Yoga Book девайсидан ўзлаштирилган. Унинг нархи Yoga Book’дан арзон бўлиб, 299 АҚШ доллар.

Lenovo Yoga A12 планшети ҳам Yoga Book сингари Halo номли сенсор клавиатурага эга. A12 гаджетининг экран диагонали 12,2 дюймни ташкил қилади.

Қурилма тўрт ядроли Intel Atom х5 процессори, 2 Гб оператив хотира, 32 Гб доимий ички хотира билан таъминланган. microSD бўлмачаси орқали хотирани янада кенгайтириш мумкин. Унинг корпусида USB Type-C стандартидаги порт мавжуд.

Планшетда Android 6.0 Marshmallow операцион тизими ўрнатилган. Ҳозирча унинг Windows 10 тизимида ишлайдиган талқини мавжуд эмас.

A12 модели уни ноутбукка айлантирувчи анъанавий 360 градусли ошиқ-мошиққа эга.

Yoga A12 қурилмасининг базавий модели қора-кулранг, оч тилла ранг корпусли талқинларда Lenovo компаниясининг расмий сайтида жорий йилнинг 8 февралидан бошлаб 299 доллар баҳосида сотувга чиқарилди.

Хабарларни тез ва осон ўқиш учун Андроид иловамизни сақлаб олинг.