WhatsApp’да «Тарих» пайдо бўлди

  •   DiMaX
  •  934
  •  21.02.2017 15:33

WhatsApp’да «Тарих» пайдо бўлди

Ўтган йилнинг сентябрида WhatsApp ишлаб чиқувчилари қизиқарли янгиланишлар билан ўз фойдаланувчиларини хурсанд қилишган эди, дея хабар қилади thenextweb.com. Мессенжерда энди ўз «статус»и сифатида суратлар, видео ва GIF-файлларни ўрнатиш мумкин бўляпти. Булардан яқин орада iOS, Android ва Windows Phone тизимларидаги қурилмаларга эга барча юзерлар фойдаланишлари мумкин.

WhatsApp’нинг янги имкониятлари худди Snapchat ва Instagram’даги «Тарих» («История») функциясига ўхшаб кетади. Энди сиз видеолавҳа ёки суратга изоҳ сифатида эмотикон, матн ёки сурат қўша оласиз. Ўзингиз томонингиздан рухсат тақдим этилган контактларингизга янгиланган статусингиз кўринадиган бўлади.

Орадан 24 соат ўтгач, статус ўз-ўзидан йўқ бўлиб қолади. Бунгача кишилар унга хабар – изоҳ қолдиришлари мумкин бўлади. Худди олдингидек, сиз барча учун ёки танланган контактлар учун изоҳлаш имкониятини ўчириб қўйишингиз мумкин.

Компания соҳибларининг сўзларига кўра, янги киритилган ўзгаришлар фойдаланувчиларга қисқагина битта статус орқали ўз ишлари ҳақида сўзлаб бериш имкониятини тақдим этади.

Янги функциядан фойдаланиш учун, WhatsApp’даги «Статус» варақасига киринг. Бу ерда контактларингизнинг статус янгилашларини кўришингиз ёки ўз статусингизни янгилаб, улашишингиз мумкин. Агарда бу функциялар кўринмаса, демак, иловангизнинг версиясини янгилашингиз керак экан.