HTC 11’нинг тақдимот куни маълум бўлди
Тайванлик ишлаб чиқарувчи HTC янги маҳсулотининг тарғиботига бағишланган реклама кампаниясини бошлади. Ҳозирча компаниянинг Facebook’даги саҳифасида эълон қилинган суратда “Баҳор келмоқда” (Spring is coming) жумласини кўриш мумкин. Сурат остида эса компания ишқибозларини “кутилмаган совға” кутаётгани маълум қилинган.
Экспертларнинг фикрича, ишлаб чиқарувчи ўзининг навбатдаги флагман смартфони бўлган HTC 11 ва янги талқиндаги HTC U Ultra мобиль алоқа воситаларининг тақдимотини режа қилмоқда.
TechRadar инсайдерининг ёзишича, HTC 11 флагмани 2550×1556 пиксел сиғимига эга экрани билан LG яқинда тақдим қилган G6 ҳамда Samsung 29 март куни намойиш қилишни режа қилган Galaxy S8 смартфонларига “жавоб” бўлади. HTC 11’да йилнинг пешқадам Qualcomm Snapdragon 835 процессори ўрнатилади. Телефон аппарати 6 ГБ “оперативка” ҳамда 128 ГБ флеш-хотирага эга бўлиб, Android Nougat 7.1.2’нинг ўзлаштирилган Sense 9.0 талқинида фаолият кўрсатади.
2016 йилнинг кўрсаткичлари бўйича, HTC компанияси даромади 13%га камайган. Компания 2017 йил бошида смартфон бозоридаги ўрнини мустаҳкамлаш учун арзон ва ўрта нархли смартфонлар ишлаб чиқаришдан воз кечганини маълум қилган.
