Samsung тахланадиган смартфонни қачон тақдим қилиши айтилди

Samsung’нинг буклама смартфон яратишига оид маълумотларни мобиль саноатдаги энг кўп давом этган миш-мишлар қаторига киритиш мумкин. Кореянинг ETNews нашрининг ёзишича, экрани тахланадиган ва букланадиган смартфон 2017 йилнинг охирларида намойиш қилинади.

Букланадиган мобиль алоқа воситаси жорий йилда намойиш қилиниб, синовдан ўтказиш ва жамоатчиликнинг унга бўлган эҳтиёжини ўрганиш учун дастлаб ишлаб чиқарилган минг донаси ҳамкорларга берилади. Уни оммавий ишлаб чиқариш жараёни эса 2018 йилдан бошланади.

Бир муддат аввал The Korea Herald газетасида тахланадиган смартфоннинг 2017 йилнинг 3-чорагида тақдим қилиниши айтилган эди.     

2013 йилдан бошлаб қулоққа чалинаётган тахланадиган смартфон фойдаланувчига ихчам қурилма тутиш эвазига, зарур маҳалда экранни икки баробар катталаштириш имконини беради. Экспертларнинг фикрича, бу технология кореялик IT-гигантга ашаддий рақиби бўлган Apple билан “пойга”да устун келиш имконини беради.