iPhone SE харид қилишнинг айни фурсати келди
Жаҳоннинг кучли смартфонлари қаторидан ўрин олган iPhone 7 ҳамда Apple тайёрлаётган iPhone 8 ҳақидаги шов-шувлар соясида айфон брендининг ажойиб “ақлли телефон”ларидан бири — iPhone SE сояда қолиб кетгандек. Аммо, Apple’нинг бир муддат аввал қабул қилган қарори iPhone SE’ни яна диққат-маркази майдонига қайта олиб чиқди.
Шундай қилиб, Apple компанияси 4 дюймли iPhone SE смартфонининг энг кичик талқинида ўрнатилган доимий ички хотира сиғимини 16 гигабайтдан 32 ГБ.га оширишга қарор қилди. iPhone SE тақдим қилинганида кўпчилик 16 ГБ доимий хотирадан ранжиган эди. Аксига олиб, қўшимча хотира ўрнатиш имконияти ҳам чекланган эди. Ихчам смартфонда “Олма”нинг илғор A9 процессори, 4K сиғимли видео суратга олувчи 12 Мп бош камера, бир сўз билан айтганда iPhone 6s’нинг барча имкониятлари жам қилинган.
2016 йилнинг март ойида тақдим қилинган iPhone SE алюминийдан ишланган металл корпуси, HD-камера, бармоқ излари сканери, Siri виртуал ёрдамчиси, 3D Touch технологиясига эга бўлмаса ҳам, тезкор ва хавфсиз фаолияти билан кўпчиликни ўзига мафтун қилган.
“Малика” савдо марказида айни пайтда iPhone SE’нинг базавий, яъни 16 ГБ талқини 2,865,000 сўмдан сотилмоқда. Айфон орзусида юрганларнинг кўпчилиги 16 ГБ доимий хотира улар учун камлик қилишини яхши биладилар. Боиси бу сиғимнинг камида 4,5 гигабайтини операцион тизимдаги илова ва дастурлар эгаллайди.
“Олма” оиласининг ихчам аъзоси бўлган iPhone SE’нинг 64 ГБ талқини эса 3,380,000 сўмгача сотилмоқда. Тез орада юртимиз смартфон бозорига ҳам 2,8 миллион сўм эвазига 64 ГБ хотирали iPhone SE кириб кела бошлайди. Бунинг учун бир оз кутиш кифоя. Айтиш жоизки, компания доимий хотирани 32 ГБ.га катталаштиргани учун бу айфоннинг нархини оширмади.
