Xiaomi Mi MIX’нинг ҳамёнбоп талқини сотувга чиқарилади

Xiaomi Mi MIX 2016 йилнинг энг оммабоп ва инновацион смартфонларидан бири бўлди, дейиш мумкин. Хитойлик тиниб-тинчимас компания айни пайтда бу моделнинг ҳамёнбоп талқинини ишлаб чиқариш билан банд. Xiaomi’нинг раҳбари маълум қилишича, Mi MIX 2 арзон талқинда жорий йилда сотувга чиқади.

Инсайдерлар тарқатаётган маълумотларга қараганда, деярли рамкасиз, йирик экранли смартфон Хитойда 999 юан, яъни $145 доллардан сотилади. Эслатиб ўтамиз, оригинал Mi MIX илк маротаба 3999 юан, яъни $580 доллардан сотувга чиққан эди.

Айни пайтда арзонлаштирилган Xiaomi Mi MIX’да 2 Гб ёки 3 Гб оператив хотира, 16 Гб ёки 64 Гб доимий ички хотира версияларида ишлаб чиқарилади. Моделнинг 3 Гб тезкор хотирали талқини $227 доллардан сотувга чиқарилади. Ҳозирча арзон талқин учун ҳам дисплейнинг оригинал талқиндаги каби, Sharp компаниясидан харид қилинаётгани маълум.

2016 йилнинг ноябр ойида намойиш қилинган Xiaomi Mi Mix 2040 x 1080 пиксел сиғимига эга 6,4 дюймли дисплейга эга бўлиб, олд панелнинг 91,3% қисмини эгаллаган экраннинг нафақат ён томонлари, балки юқори ва қуйи қисмлари ҳам ромдан холи дизайнда ишлаб чиқарилган.