Эксклюзив видео: Galaxy S8 ва iPhone 7’ни бетонга ташлаб кўришди!
Samsung компанияси яқинда Galaxy S8 ҳамда Galaxy S8 Plus флагманларини тақдим этганидан хабарингиз бор. Бу янги смартфонлар ҳам худди аввалгиларидек, расман тақдим этилишигачаям катта шов-шувларга сабаб бўлди, кейин эса уларнинг хусусиятларини рақобатчилари билан солиштириш, рекордларини таъкидлаш тенденцияси авж олди.
Жумладан, унинг қийинчилик билан iPhone 7’ни мағлуб қилгани, камераларининг бошқа флагманлар билан қиёсланиши шулар қаторидандир. Шу билан бирга, ундаги iPhone 7’дан устун 6 технология, аммо сотиб олмаслик учун 5 сабаб ҳам кўрсатилди, икки рақобатчининг аккумуляторлари “жанги” ўтказилди, Galaxy S8’ни алдаш йўли топилгани маълум қилинди.
Энди эса навбат мазкур смартфоннинг ташқи чидамлилик синовига, яъни – дроп-тестга келди.
Маълумки, Galaxy S8 ва Galaxy S8 Plus моделларининг корпуси, худди олдинги иккита флагмандагидек – олд ва орқа томонлари тобланган шишадан ишланган, ўртасида эса металл ром. Хўш, уларнинг зарбаларга чидамлилик даражаси қанақа экан? YouTube’даги TechRax каналида видеоблогер Тарас Максимюк дунёда биринчилардан бўлиб шуни синаб кўришга қарор қилди. У Samsung’нинг янги флагманлари ромсиз дизайни қанчалик муваффақиятли чиққанини, улар қўлдан тушиб кетса нима бўлишини текшириб кўрди.
Кўриб турганингиздек, дроп-тестда Galaxy S8 модели алвон рангли iPhone 7 билан бирга, бир хил шароитда текширувдан ўтказилган. Пастки чеккаси билан қаттиқ юзага тушганида ҳар икки смартфон ҳам бирор жиддий шикаст олмаган. Иккинчи ташланишида эса Galaxy S8 тўғридан-тўғри пастки бурчаги билан урилган. Бунда унинг периметридаги металл ромда сезиларли излар пайдо бўлган, аммо шиша юзаси бутун қолган.
Кейин эса ҳар икки гаджетни олд юзаси билан бетонга ташлаб кўришган. Натижада iPhone 7 ойнаси синиб кетган, смартфоннинг ўзи эса умуман ёқилмай қолган. Galaxy S8 олд ойнасининг эса юқори бурчакларида чатнаш юзага келган, холос. Афтидан, бунда Samsung флагманининг олд ва орқа юзаларига қопланган Gorilla Glass 5 тобланган шишасининг хизмати катта.
Биз эса сизга ўз смартфонларингиз устида бу каби тестлар ўтказиб кўришни тавсия этмаймиз.
