Chrome’га рекламани блоклаш функцияси қўшилади

  •   DiMaX
  •  2481
  •  20.04.2017 16:14

Chrome’га рекламани блоклаш функцияси қўшилади

Google компанияси Chrome браузерининг мобиль ва десктоп версияларига рекламани чеклаш (блоклаш) функциясини қўшишга қарор қилди. Wall Street Journal нашрининг ёзишича, браузернинг ички чекловчиси фойдаланувчиларга веб-саҳифаларни бемалол кўришга халақит берадиган реклама эълонларини ушлаб қоладиган бўлади.

Нашр манбаларининг таъкидлашича, янги функция яқин бир неча ҳафта ичида расман тақдим этилади. Ҳозир ишлаб чиқувчилар блокловчининг ишини текширувдан ўтказишяпти ҳамда рекламани таниб олиш алгоритмларини охирига етказишяпти.

Аввалроқ кучли таъсирга эга Coalition for Better Ads ташкилоти (Google компанияси ҳам унинг таркибига киради) интернетдаги рекламалар мос келиши шарт бўлган стандартлар рўйхатини эълон қилган эди. Афтидан, янги блокловчининг фильтрлари айнан мана шу тавсияларни инобатга олган ҳолда созланган бўлади.

Кўпчиликни ҳайрон қолдирувчи жиҳат шундаки, ўз даромадининг асосий қисмини айнан рекламалардан олувчи Google компанияси ўз браузерига рекламани чекловчи жиҳоз қўшаётир. Бироқ бундоқ ўйлаб қаралса, бу тамоман мантиқли қадам.

Чет блокловчиларнинг кенг тарқалиши шунга олиб келдики, қайси эълонлар кўрсатилишию қайсилари ушлаб қолинишини шу чекловчини ишлаб чиқувчилар ҳал этадиган бўлишди. Ҳатто Google ҳам ўз реклама эълонларини чекламаслиги учун Adblock Plus яратувчиси – Eyeo GmbH компаниясига ҳақ тўлашига тўғри келади.

Энди Google ўз чекловчисини чиқаргач, фойдаланувчига нимани кўрсатишу нимани ушлаб қолиш унинг ўз қўлида бўлади. Бундан ташқари, компания бу билан бошқа блокловчиларга кучли зарба беради. Фойдаланувчилар Chrome’нинг ўзига ўрнатилган фильтрларни афзал кўрган ҳолда, бошқа чекловчиларни ўрнатишдан воз кечишига компаниядагиларнинг ишончи комил.

Google «Агарда ҳодисани енга олмасанг, унга етакчилик қил» деган тамойилга амал қилаётир.

Биз эса сайтимиз мухлисларига, Chrome’га рекламани блоклаш функцияси қўшилгунига қадар, iOS ва Android смартфонларида рекламадан буткул халос бўлиш усуллари ҳамда компьютерда рекламалардан биратўла қутулиш йўлларидан фойдаланиб туришларини тавсия этамиз.

Сайт янгиликларидан доимий хабардор бўлиш учун Телеграм каналимизга қўшилинг!