Galaxy S8’дан 2 ҳафта фойдалангач, iPhone 7 эгаси қайси смартфонда қолишини айтди
Galaxy S8 – муваффақиятсиз смартфондан сўнг Samsung’ни умидсизлик гирдобидан олиб чиққан флагман. Компания бу флагман смартфони билан олд панели ромдан буткул холи жаҳондаги илк мобил алоқа воситасини тақдим этишга эришди. Кореялик ишлаб чиқарувчининг жозибадор дизайнга эга Galaxy S8+ флагманини таниқли IT-журналист Зак Экштейн фойдаланиб кўрди фикрларини баён қилди.
Galaxy S8’нинг iPhone 7’дан жиддий устунлиги бор: AMOLED-экрани билан у сўзсиз ғолиб. Албатта, iPhone 7 Plus тасвирни аниқ-тиниқ акс эттиришда жаҳонда етакчи. Бироқ, Galaxy S8+ билан солиштирганда “Олма” маҳсулотининг ўзига бўлган ишончи йўқолгандай бўлади. Бироқ, янаям муҳимроғи — Samsung назарий жиҳатдан имконсиз қулайликни амалга оширган: 6,2 дюйм диагоналли ихчам смартфон тайёрлашга муваффақ бўлган.
«Тўғри, Galaxy S8 жозибадорлиги билан iPhone 7 ҳамда iPhone 7 Plus’ни доғда қолдиради. Қайрилма ёнларга эга дисплей ҳамда орқа панелнинг нафис бирикуви келажакка хос. Бир муддат Galaxy S8’дан фойдаланиб яна қадрдон iPhone 7 Plus моделидаги смартфонимни қўлга олишимни ясси экранли замонавий телевизордан сўнг яна лампали телевизорга қайтишга қиёслаш мумкин», – дейди Эпштейн.
Samsung Galaxy S8 биргина ягона ғоя атрофида бунёд этилган — ромсиз телефон яратиш. Шу боис ҳам, Samsung қойилмақом дизайн ҳамда серҳашам экранли смартфон яратишга эришган. Бироқ, S8 жиддий рақиб сифатида iPhone қурилмасига қарши майдонга тушса, натижа Samsung’ни хурсанд қилмаслиги мумкин.
«Galaxy S8 бошқа Android-смартфонлардан кўра яхшироқ ва қулай интерфейс тизими ишлайди. Айниқса, сўнгги — Samsung Experience талқини қулайликларга янада бой. Аммо, Nougat – бу iOS эмасда! Galaxy S8 эса шу учун ҳам iPhone бўла олмайди, – дейди журналист. – Galaxy S8+ билан ўтган 2 ҳафталик синовдан сўнг iPhone 7 Plus – ҳар жиҳатдан айни пайтда сайёрамиздаги энг яхши смартфон деган қарорга келдим».
iPhone 7 Plus’нинг Galaxy S8’дан 5 устун жиҳатлари:
1. Операцион тизим. iOS тезкорлик ва самарадорликда Android’дан устун. Ҳаттоки янгиланган Samsung Experience талқинида ҳам. Мисол учун, “Олма” қурилмаларини бир-бири билан боғлайдиган Apple Continuity тизими ўзининг аналоги бўлмиш Samsung Connect’дан кўра тез ва осон ишлайди.
2. Илова. iOS иловалари Android иловаларига қараганда хавфсиз ва ишончли. Афтидан, дастур яратувчилари доим ҳам Google қоидаларига амал қилишмайди ва шу туфайли улардан фойдаланишда муаммолар кузатилади. iOS иловалари эса барқарор ишлаши билан ишончни қозонган.
3. Самарали фаолият. Тўғри, кўпчилик бенчмарклар янги гелекси тезкор ишлашда сўнгги айфонни ортда қолдирди, деган гап-сўзлар қулоққа чалинди. Бироқ, реал вазиятда iPhone 7 Plus осонлик билан Galaxy S8’ни мағлуб қилиши мумкин. Android ҳаттоки жаҳоннинг ҳозирча энг кучли Snapdragon 835 процессори билан ҳам iOS’га бас келиши қийин. Шунингдек, “Олма” корпорацияси ҳам процессоридаги ядролар сонини оширса, Snapdargon 835 ҳам олдида ип эша олмайди.
4. Қувват сарфлаш ва фаолият кўрсатиш вақти. iPhone 7 Plus тўлиқ қувват билан фаолият кўрсатиш ва қувватни тўғри сарфлашда Galaxy S8’дан устун.
5. Хизмат кўрсатиш. Жаҳоннинг ҳеч бир ерида мобил қурилмаларига Apple’чалик сифатли хизмат кўрсатадиган бренднинг сервис марказларини топиш мушкул.
Қолаверса, Galaxy S8 ўта нозик ва кичик эҳтиётсизлик ҳам унинг шиша корпусига жиддий зарар етказиши мумкин. Яна бир баҳли жиҳати – иккинчи стерео-динамикнинг йўқлиги. Натижада, овозни фақатгина моно-режимда тинглаш мумкин.
Қолаверса, бармоқ излари сканери жуда ноқулай равишда орқа панелнинг бир чеккасига жойлаштирилган. Кўз сканери ва қиёфани танийдиган функция яхши, бироқ кўз сканери телефонни секин блокировкадан чиқарса, юзни танийдиган режимни сурат билан ҳам осон алдаш мумкин.
«Кўпчилик смартфон фойдаланувчилари Android ҳамда Google тизимларига боғланиб қолишган. Булар учун Galaxy S8 энг муносиб танлов. Google’нинг аксарият хизматлари айни пайтда iOS тизимида ҳам ишлайди, бироқ улар iPhone қурилмасига тубдан интеграция қилинмаган. Бу — айфоннинг камчилиги. Умумий таассурот ва ўзига хослик жиҳатидан ғолиб битта – Samsung Galaxy S8, бироқ iPhone 7 Plus қирол сифатида ҳозирча ўз ўрнида қолади».
