Telegram’даги энг зўр каналлар-3: рус тилини янада яхшироқ ўрганамиз

  •   DiMaX
  •  8986
  •  28.04.2017 15:08

Telegram’даги энг зўр каналлар-3: рус тилини янада яхшироқ ўрганамиз

Ҳаётда ва интернетда бизга кўп керак бўладиган тиллардан бири – рус тили. Бир қарашда кўпчилигимиз русчани яхши биламиз, деб ўйлаймиз, аммо унинг нозикликлари шунчалар кўпки… Бунга эса бирор матнни русча ёзишга ёки русчага ўгиришга тўғри келиб қолганида амин бўламиз.

Telegram-каналларга бағишланган бугунги тўпламимиз рус тили бўйича саводхонлигини ва билимини ошириш истагида бўлганларга мўлжалланган. Шу каналлар орқали мазкур тилнинг имлоси, пунктуацияси ва услубияти бўйича маслаҳатлар, мисоллар олиб боришингиз мумкин.

1. Исправил

Мусаҳҳиҳ (корректор) Никита Юкович ҳар ҳафта имлога оид хатоларнинг таҳлилини бериб боради. У бирор мисолни «тўғри/нотўғри» («правильно/неправильно») форматида белгилаб, сабабларини тушунтириб беради. Рус тили ҳақидаги энг фойдали каналлардан бири.

2. Correctarium

Тўғри ёзиш бўйича маслаҳатларга ва хатолар таҳлилига бағишланган яна бир канал. Мисоллар билан тушунтириб беришлари аҳамиятли.

3. Мильчин-канал

Аркадий Мильчин ва Людмила Чельцованинг «Ношир ва муаллиф маълумотномаси» («Справочник издателя и автора») китобидан олинган маслаҳатларни бериб борувчи канал. Афсуски, анча вақтдан бери унга янги пост чиқарилмаган. Бироқ шу пайтгача эълон қилинганлари ҳам эътиборга лойиқ – улардан кўп нарса ўрганиш мумкин.

4. Компотик Сарычевой

«Ёз, қисқартир» («Пиши, сокращай») китоби ҳаммуаллифи Людмила Сарычеванинг канали. Людмила гапнинг мазмунига зарар етказмасдан, ортиқча сўзларни олиб ташлаш йўлларини мисолларда кўрсатиб беради. Шунингдек, таҳрир бўйича фойдали мақолаларга йўлловчи ҳаволаларни ҳам эълон қилиб боради. Каналда ҳэштеглар бўйича қулай навигация ҳам йўлга қўйилган. Масалан, #скрщ – матндан ортиқча жойларини олиб ташлаш бўйича маслаҳатлар; #наполняй – матн тушунарлироқ бўлиши учун уни тўлдириш йўллари ҳақида тавсиялар.

5. Букварик

Рус тилидаги сўзлар ва ибораларнинг маъноларини тушунтириб ҳамда уларнинг келиб чиқишини изоҳлаб борувчи канал.

6. +5 новых слов

Бу каналда ҳам сўз маънолари изоҳлаб берилади. Олдингисидан фарқли равишда, бу ерда нисбатан кам учрайдиган сўзларга кенг ўрин ажратилган. Мазкур канал – луғат бойлигини ошириш учун жуда керакли манбалардан бири.

7. #555слов

«555 слов» лойиҳасининг канали. Мазкур лойиҳа иштирокчилари ҳар ҳафта муҳаррирлар ва сценаристларнинг биттадан топшириғини бажаришади ва 555 та сўздан ошмаган ҳажмда матнлар тузадилар. Сиз бу лойиҳага қўшилиш истагида бўлмасангиз ҳам, барибир унинг канали сизга фойдали бўлади. У ерда хатосиз ёзиш бўйича маслаҳатлар беришади, ёзувчилик маҳоратини ўргатишади ва фойдали ҳаволалар эълон қилиб боришади.

8. Главред

Агар шу кунгача бу каналга обуна бўлмаган бўлсангиз, сал кечикибсиз. Тезда бу хатонгизни тўғриланг. Унда матн, таҳрир, ахборот услуби ҳамда реклама ҳақида Максим Ильяховнинг маслаҳат ва мақолаларини топасиз.

9. Паша и его прокрастинация

Матнни қандай ёзиш ҳақида Павел Федоровнинг канали. У маслаҳатлар, мақолалар тезислари ва фойдали материалларга ҳаволаларни чоп этиб боради.

10. Что почитать редактору

Медиа, журналистика ва рус тили хусусидаги мақолаларнинг кундалик сараламаси.

11. Чехов пишет

Рус адабиётининг етук намояндаларидан бири – Антон Павлович Чеховнинг 1876–1904 йиллардаги мактублари чоп этиб бориладиган канал.

12. Библиотека

Мазкур каналда ҳар куни турли услубларда ёзадиган машҳур адибларнинг қисқа ҳикояларини бериб боради. Битта ҳикоянинг мутолаасига 5 дан 25 дақиқагача вақт кетади.

Шунингдек, Telegram-каналларнинг турли йўналишлардаги биринчи ва қиз-аёлларга бағишланган иккинчи тўпламига ҳам назар солишингизни тавсия этамиз.

Хабарларни тез ва осон ўқиш учун Андроид иловамизни сақлаб олинг.