Microsoft олими смартфоннинг “қотили”ни айтди
“Смартфонлар ўз умрини яшаб бўлди”, дейди Microsoft’нинг муҳандис кашфиётчиларидан бири Алекс Кипман. Голограмма линзаларини ривожлантириш йўналишида изланишлар олиб борувчи тадқиқотчининг фикрича, одамлар ҳали бу ҳақиқатни англаб етганликлари йўқ. Унинг айтишига қараганда, технология келажаги батамом атрофимиздаги борлиқни тўлдирадиган гибрид виртуал воқелик қурилмалари ихтиёрида бўлади.
Бундай қурилмалар эса ўзларидан голограмма нурларини таратиб, ён-атрофимизни керакли виртуал буюм ҳамда маълумотлар билан бойитишади. Натижада, смартфонларга зарурат қолмайди. Моддий тугма ва дисплей ўрнини нурли тугма, дисплейлар эгаллайди.
Тўғри, мобил қурилмалар саноати ва бозоридаги молиявий айланма жаҳон иқтисодиётининг муҳим қисмига эгалик қилади. Мисол учун, биргина 2017 йилнинг ўзида 1,5 миллиард дона турли-туман мобил қурилмаларнинг сотилиши кутилмоқда. Microsoft эса HoloLens технологиясини ривожлантиришга катта маблағ сарфламоқда.
Экспертларнинг фикрича, бугунги виртуал воқелик шлемларининг ихчамлашуви, Google ривожлантираётган рақамли кўзойнакларнинг такомиллашуви учун 10 йиллар керак бўлади. Шунда ҳам, бу каби қурилмалар смартфонга одамларни янада тобе қилади.
