Янги Opera виртуал мулоқотни янада қулайлаштиради
Энди мазкур браузернинг ён панелида энг оммабоп чатлар: Facebook Messenger, WhatsApp ва Telegram жойлаштирилади.
Opera орқали чатда мулоқотни бошлаш учун, шунчаки браузернинг ён панели – сайдбардаги тегишли тугмачани босишингиз ва чатдаги ўз аккаунтингизга киришингиз лозим.
Шундан кейин сиз сичқонча ёрдамида битта чертиш орқали керакли чатга киришингиз мумкин бўлади. У браузер экранининг чап томонидан чиқиб келувчи ён панелда пайдо бўлади.
Айни пайтда ўзингиз кўраётган веб-саҳифадаги маълумотларни мессенжерда улашиш жуда қулай. Матнни нусхалаб оласиз, чат ойначасини очиб, ташлайсиз – тамом! Суратларни юбориш эса янада осон – шунчаки сичқонча ёрдамида ушлаб, чат дарчасига олиб келиб ташласангиз кифоя.
Агарда мессенжерлардан бири орқали узоқ муддатли суҳбатга киришадиган бўлсангиз, унинг панелини махсус тугмача ёрдамида бириктириб қўйиш имкони ҳам бор. Бунда браузер ойнаси икки қисмга бўлинади: улардан бирида Facebook Messenger, WhatsApp ёки Telegram жойлашади, иккинчисида эса – сизга керакли сайт акс этади.
Opera’да бу функциянинг пайдо бўлиши фойдаланувчиларни ҳар гал бирор хабар келганида смартфонни қўлга олиш ёки компьютерда чатнинг десктоп дастурига ўтиш заруратидан халос этади. Бирйўла, интернетда кезиш асносида мессенжерда мулоқот ҳам қилиб бориш мумкин.
Мазкур браузерни ўз сайтидан юклаб олиб ўрнатишингиз мумкин.
