Ўйинқароқ рус блогерининг “шўрига шўрва тўкилди”
Россиялик блогер Руслан Соколовскийнинг христиан ибодатхонасида Pokemon Go ўйинини ўйнаган жараёнига оид видеолар интернет тармоғида тарқалиб кетгач, у 2016 йилнинг сентябр ойида ҳибсга олинган эди.
Видеологер Россия қонунчилигининг виждон ва диний эътиқод ҳуқуқининг поймол қилиниши, жўртага адоват уйғотиш ёки инсон қадр-қимматини ерга уриш билан боғлиқ қонун меъёрларини бузишда айбланмоқда.
Олиб борилган суриштирув ва тергов натижалари бўйича Екатеринбург Олий суди блогерни диндорлар эътиқодига нисбатан жўртага ҳақорат қилишда айбдор деб топди.
Судянинг қайд этишича, ашёвий далил сифатида тақдим қилинган 9 та видеороликда дин ва миллатга нисбатан амалга оширилган иснодга гувоҳ бўлиш мумкин.
Айбловга кўра, екатеринбурглик 21 ёшли блогерни умумий режимли колонияда 3,5 йилга озодликдан маҳрум қилиш қайд қилинган.
Шунингдек, Руслан Россия Федерациясининг “Жиноят кодекси”га зид равишда. тақиқланган ахборот ташувчи восита, яъни видеокамерали ручкани уйида сақлагани учун ҳам 4 йиллик қамоқ жазосига ҳукм қилиниши мумкин эди.
