Роботлар учун тери яратилди – энди улар сеза олишади! (+видео)
Миннесота университети олимлари кўчма сенсор қурилма ишлаб чиқишди, у роботларга атроф-муҳитни худди тирик жонзодлардаги тери сезгисидаги каби ҳис этиш имконини беради. Бу ҳақда Sciencedaily нашри хабар берган.
Етакчи тадқиқотчи Майкл Макалпайн сўзларига қараганда, «бионик тери» деб аталувчи бу материал электрон сенсорларга эга. У роботлар хизматидан фойдаланилаётган турли соҳаларда кенг қўлланилишга жорий этилиши мумкин. Масалан, олимнинг фикрича, бу тери жарроҳ роботларни янада такомиллаштириб, мураккаб операцияларни янада аниқлик билан ўтказишга ёрдам беради.
Олимлар мазкур материални махсус йиғилган 3D-принтерда чоп этишди. Принтер ва унинг «сиёҳ»идаги асосий хусусиятлардан бири – тезкорликдир: чоп этилган материал аллақачон қўлланишга тайёр бўлади.
2013 йили улар ҳақиқий инсон қулоғини 3D-принтерда чоп этишган эди. Энди эса «бионик тери»ни яратишди. Дарвоқе, бу кўчма электрон технологияни одамларга ҳам жорий этса бўлади. Масалан, сенсорларни аскарларнинг саломатлигини мониторинг қилиб боришда қўллаш мумкин.
Технология фақат сенсорли сунъий терини чоп этиш билангина чекланиб қолмайди. Макалпайннинг ихтироси инсон терисига электроникани жорий этиш имконини беради.
Аввалроқ Tesla, Space X ва Hyperloop лойиҳаларининг муаллифи, таниқли бизнесмен Элон (Илон) Маск инсониятни киборгга айлантиришни таклиф қилган эди. Унинг қўл остидаги, инсон мияси ҳамда компьютерни ўзаро боғлаб қўйиш технологиясини ривожлантираётган Neuralink компанияси аллақачондан бери бу борада тадқиқотлар олиб боради. Эҳтимол, чиндан ҳам киборглар даври яқин қолгандир?
