Бу технология қудратли нефт саноатини инқирозга учратади
Жадал ривожланаётган технологиялар тадқиқоти билан шуғулланадиган америкалик Tech Xplore компаниясининг таҳлилларига кўра, тўлиқ электр қуввати билан ҳаракатланадиган электромобиллар “эраси”гача оз фурсат қолди.
Унга кўра, яқин йиллар ичида бу технология ҳуқуқий жиҳатдан тартибга солинади. 2030 йилга келиб ривожланган давлатларда йўловчилар томонидан босиб ўтилган масофанинг 95 фоизи электр автомобиллар хизматига тўғри келади. Бу жараён 2021 йилдан бошлаб оммалаша бошлайди.
Натижада, жамоат транспорти, жумладан хизмат кўрсатувчи компаниялардан фойдаланиш бир неча баробарга арзонлашиб, одамлар шахсий автомобиллардан кўра, хизмат кўрсатувчиларнинг машиналаридан фойдаланишни афзал кўришади. Таҳлилларга кўра, бу орқали оилалар ойлик даромадларининг 10 фоизини тежаб қолишга эришадилар.
Бу технология Ер сайёрасида ҳукмрон бўлган “нефт сиёсати”га ҳам таъсир кўрсатиб, нефт истеъмолини кескин қисқаришига сабабчи бўлади. Мисол учун, 2016 йилда жаҳонда ҳар куни 96 миллион баррел нефт истеъмол қилинган бўлса, 2021 йилдан сўнг бу кўрсаткич камайиб, 70 миллионга тушади.
Тадқиқотдан маълум бўлишича, 2030 йилга келиб йўловчи автотранспорти учун нефтга бўлган эҳтиёж 90 фоизга камаяди. Натижада, ёқилғи маҳсулотларининг нархи тушиб кетиб, нефт саноати инқирозга юз тута бошлайди.
