Сунъий онг 27 йил аввал ўғирланган болани топиб берди
«Хитойча Google» ҳисобланувчи Baidu компанияси томонидан яратилган сунъий онг технологияси хитойлик ота-онага бундан 27 йил олдин ўғирлаб кетилган боласини топишда ёрдам берди. Бу ҳақда Creativity-online нашри хабар беради.
«Бола уйига келади» (хитойчада – Baobeihuijia) деб номланган сайтга Фу Гуй ўзининг ўн яшарлик пайтидаги суратини юклади. Бу пайтда у ҳали, ота-онаси ҳам унинг болаликда тушган бир нечта расмини сайтга жойлаганидан бехабар эди. Тизим бу йигит ҳамда унинг ота-онаси юклаган суратларни ўзаро солиштириб таҳлил этиб чиқди ва уларга хабар қилиб, ўзаро учраштирди. Кейинчалик ўтказилган ДНК тести уларнинг ҳақиқатан ҳам қариндош эканликларини исботлади.
Мазкур технология ҳали унчалик мукаммал эмас ва фақат юкланиш оралиғи олти йилгача бўлган суратларнигина ўзаро таққослай олади. Аммо, Baidu вакилларининг таъкидлашларича, тизимнинг ишлаш аниқлиги 99,77% ни ташкил этади. Шунингдек, у барибир одамлардан кўра тезроқ ишлайди-ку.
Хабарда айтилишича, Хитойда ҳар йили ўн минглаб болалар ўғирланади. Уларни бола боқиб олишни истаганларга сотишади, қулликка солишади ёки бошқа тубан мақсадларда фойдаланишади.
Baobeihuijia сайти эса шу ва бошқа сабаблар туфайли бир-бирини йўқотган қариндошларни ўзаро топиштириш мақсадида ташкил этилган. Бир неча йил мобайнида унинг кўнгилли тарзда ишловчи ходимлари ота-оналар ва болалар томонидан юкланган расмларни эринмасдан ўзаро таққослаб, имкон қадар уларга мадад бўлиб келишган. 2017 йилнинг март ойидан эса Baidu бу сайтга ўзининг юзни таниш технологиясини жорий этишни таклиф қилди. Мана, бунинг натижалари кўзга ташлана бошлади.
