Apple iPhone 8: 10 йиллик юбилейга аталган кузирлар

Apple iPhone 8: 10 йиллик юбилейга аталган кузирлар

Айфон брендининг тақдим қилинганига 10 йил тўлиши муносабати билан, Apple бу йил iPhone туркуми тарихида инқилобий ўзгаришларга эга энг илғор смартфонни намойиш қилиши кутилмоқда.

Кўпчиликнинг фикрича, iPhone 7 оддий смартфон: аввалги айфонлар билан таққослаганда дизайн деярли ўзгармаган, қўш камера эса фақат Plus-версияда мавжуд. Apple, афтидан, кузирларини 10 йиллик юбилей учун асраб қўйган. Куз ойида ҳаммаси аниқ бўлади.

Ҳозирча iPhone 8’нинг 5,8 дюйм экранли, корпуси 143,5 x 70,9 x 7,7 мм бўлиши тахмин қилинмоқда. Орқа панелдан эса вертикал кўринишдаги қўш камера ўрин олган бўлади.

Аксарият таҳлилчиларга кўра, iPhone 8 тақдимоти бу йил кечикади. Apple’нинг янги флагмани виртуал биометрик сканер, яъни Home виртуал кнопкасини бевосита экрандан ўрин олган оммавий ишлаб чиқариладиган илк смартфон бўлади. Бу технологияни жорий қилиш эса вақтни талаб қилади. Маълумотларга кўра, iPhone 7s ҳамда iPhone 7s Plus 2017 йилнинг сентябридан сотувга чиқса ҳам, iPhone 8 октябр ёки ноябрда тақдим қилинади.

Айни пайтда смартфон саноатида рамкасиз дизайнли теефонлар оммалашмоқда. Samsung Galaxy S8 ҳамда LG G6 каби етакчи бренд моделлари шу дизайнда. «Олма» корпорацияси ҳам iPhone 8’ни ана шундай — олд панелни тўлиқ эгаллаб олган дисплейда ишлаб чиқармоқчи. Шу билан бирга, қурилмада қатор инновацион функциялар, жумладан қиёфани танийдиган ва тўлдирилган воқелик технологиясини қўллаб-қувватлайдиган 3D-камера, экранида OLED-дисплей, Bluetooth 5, симсиз қувватлаш технологияси татбиқ этилади.

Bluetooth 5 стандартида фаолият радиуси ҳозиргидан 4 маротаба катталашиб, маълумот алмашиш тезлиги 2 баробарга ошади. Bluetooth 5 ёрдамида гаджетлар 200 метргача масофада ўзаро боғланиб, секундига 4-12 мегабит маълумотни алмашиш имконига эга бўладилар. Bluetooth Low Energy технологиясига эга бу стандарт қувватни ҳам тежайди.

Янги айфон Apple тарихидаги энг қиммат флагман бўлади. Business Insider нашрига кўра, iPhone 8 флагмани 999 АҚШ долларидан бошлаб сотувга чиқарилади. Яъни, 128 ва 256 гигабайтли доимий хотирага эга талқинлар 999 ва 1099 доллардан сотилади. iPhone 8 смартфони 32 Гб хотира талқинида ишлаб чиқарилмайди. Айни пайтда энг қиммат айфон — iPhone 7 Plus’нинг 256 гигабайтли талқини бўлиб, 969 доллардан сотилмоқда.

Сайтимизнинг энг чиройли расмларини Инстаграмдаги саҳифамизда томоша қилинг!