Galaxy J7’нинг “Max” талқини сотувга чиқади

Samsung компанияси оммабоп-ҳамёнбоп модели бўлган “Galaxy J7″нинг “Max” талқинини тайёрламоқда. Бу — Galaxy J2 (2016)’дан кейинги орқа панелдаги бош камера модули атрофи огоҳлантиришлардан бохабар қилувчи “Smart Glow” ақлли чироғига эга иккинчи смартфон бўлиши мумкин.

Samsung Galaxy J7 Max 2.5D шаклидаги ёнлари букик ҳимоя шишаси билан қопланган 5.7 дюймли Full HD экран, 1.6 ГГц частота тезлигида ишлайдиган 8 ядроли MT6757V Helio P20 процессори ва Mali T880 видео-картаси, 4 ГБ тезкор ҳамда қўшимча флешка орқали 256 гигабайтгача кенгайтириш мумкин бўлган 32 гигабайтли доимий хотира, 3,300 мА соатли аккумуляторга эга.

Муҳим жиҳати, Samsung Galaxy J7 Max “J” туркумига кирувчи смартфонлар орасида f/1.7 ўлчамли кенг апертура линзасига эга 13 мегапикселли сенсор билан таъминланган илк смартфон бўлиши мумкин. Бу — смартфон ёруғлик паст шароитда ҳам яхши суратга олиш имкониятига эга, дегани. Яна бир қизиқ жиҳати — олд панелдаги селфи-камера учун ҳам сиғими 13 МП бўлган модул танланган. Ҳар иккала камера LED фоточақноғи билан таъминланади.

Android 7.0 Nougat операцион тизими бошқарувида ишлайдиган фаблетда WiFi, Bluetooth, бармоқ излари сканери, GPS, A GPS, Samsung Pay Mini каби замонавий мобил технологиялар жорий қилинади.

Samsung Galaxy J7 Max июннинг 2-ҳафтасида 311 АҚШ долларидан сотувга чиқарилади.