Хушхабар: Telegram десктоп версиясида энди овозли қўнғироқ қилиш мумкин!
Telegram мессенжерининг мобил версиясида овозли қўнғироқлар жорий этилганидан хабарингиз бор. Орадан кўп вақт ўтмай, ишлаб чиқувчилар Telegram Desktop’нинг альфа-версияси, яъни бошланғич талқинида ҳам шу функцияни йўлга қўйишди. Мана энди, бугун унинг умумий истеъмолга чиқарилган янги версиясида овозли қўнғироқлар расман тақдим этилди.
Мазкур функция десктоп мессенжернинг Windows, macOS ҳамда Linux тизимли компьютерларга мосланган вариантларига биратўла киритилган. Энди фойдаланувчилар нафақат мобил телефондан, балки компьютердан ҳам смартфонга ёки компьютерга Telegram-қўнғироқларни амалга оширишлари мумкин!
Дастурнинг янги версияси интерфейсининг юқори панелида телефон гўшаги шаклидаги янги тугмача пайдо бўлди. Керакли контактни танлаб туриб, ўша тугмача босилса, қўнғироқ ишга тушади. Чақирилаётган абонентда эса қалқиб чиқувчи ойнада қўнғироқни қабул қилиш ҳамда рад этиш тугмачалари кўринади.
Telegram, мессенжер, иловалар, хабарлар
Десктоп версияда ҳам худди мобил версиясидаги каби аудиоқўнғироқларни шифрлаш тизими йўлга қўйилган. Фойдаланувчилар Telegram-қўнғироқлар орқали кечаётган суҳбатларининг шифрланган боғламада амалга ошаётганига тўртта эмотиконни таққослаш орқали ишонч ҳосил қилишлари мумкин.
Реал вақт режимида овозли мулоқот қилиш имкониятининг жорий этилиши Telegram’нинг янада оммалашувида муҳим қадам ҳисобланади. Аввал шу функцияси йўқлиги сабабли бошқа мессенжерлардан фойдаланаётганлар энди бемалол Telegram’га кўчиб ўтишлари мумкин. Зеро, унда фойдаланувчиларнинг ўзаро мулоқотларига тегишли маълумотлар махфий сақланиши кафолатланган.
Овозли қўнғироқлардан ташқари, десктоп мессенжернинг янги версиясида чатлар маъмурлари учун янги ҳуқуқлар тақдим этилган. Шунингдек, тўлиқ экранли режимда эмотиконлар панелининг жойлашув ўрни ҳам ўзгартирилган.
Telegram десктоп мессенжерининг Windows, macOS ёки Linux тизимли компьютер ва ноутбукларга мосланган вариантларини унинг расмий сайтидан кўчириб олиб, янги имкониятлардан баҳраманд бўлишингиз мумкин!
