Бир ойда нечта Galaxy S8 сотилгани маълум бўлди
Жорий йилнинг 21 апрелидан сотувга чиқарилган Samsung Galaxy S8 ҳамда Galaxy S8+ смартфонларидан бугунга қадар 5 миллион дона сотилган. Бу тўғрида The Investor нашри Samsung вакилига таяниб хабар тарқатмоқда. Компания Galaxy S8 ва Galaxy S8+ гаджетларидан илк чоракда 16 млн дона сотишни режа қилган.
Таққослаш учун айтамиз, тез сотилиш бўйича рекорд iPhone 6s ҳамда iPhone 6s Plus’га тегишли бўлиб, флагманлар илк дам олиш кунларининг ўзида 13 миллион дона сотилган эди.
Samsung Galaxy S8 ва S8+ аввалига АҚШ, Канада, Жанубий Кореяда, кейинроқ жаҳоннинг бошқа ҳудудларида сотила бошланди. Компаниянинг маълум қилишича, май охиригача флагманлар жаҳоннинг 120 давлатида сотувга чиқади.
Таҳлилчиларнинг фикрича, савдо ўсиши шу тахлит давом этса, 2-чорак якунига қадар 20 миллион дона, 1 йил ичида эса 60 миллион дона Samsung Galaxy S8 ва S8+ смартфонлари сотилади. Етказиб берувчиларнинг фикрича, Galaxy S8 смартфони Galaxy S8 Plus’га қараганда 15–20 %га яхшироқ сотилмоқда.
799 ва 899 АҚШ долларига баҳоланган Samsung Galaxy S8 ҳамда S8 Plus юртимиз смартфон бозорида 2017 йилнинг 10 майидан 5.7 ҳамда 6.7 миллион сўмдан сотилмоқда.
