Telegram-канални қандай юритган маъқул?

  •   DiMaX
  •  2113
  •  19.05.2017 11:41

Telegram-канални қандай юритган маъқул?

Telegram’да канал очиш – ўзингизга ёққан нарса-ҳодисалар ҳақида сўзлаб беришнинг ва бунга қизиқувчи сифатли аудитория тўплашнинг яхши усули. Бироқ канални тўғри юритмасангиз, у ҳолда унинг обуначилари сони ўсмасдан қолаверади.

Лайфхакер сайти бунинг олдини олиш учун қуйидаги бешта маслаҳатини тақдим этади.

  1. Асосий мавзудан четлашманг ва ўз фикрингизни ортиқча тиқиштирманг.

Канал учун мавзуни белгилаб олдингизми – унга қатъий амал қилинг. Дунёда қизиқарли воқеалар кўп, улардан кўпчилиги ҳақида бошқаларга гапириб бергингиз, бу борада ўз нуқтаи назарингизни баён этгингиз келиши мумкин. Бироқ фойдаланувчилар каналингизга муайян бир мавзудаги контент учун обуна бўлишган. Иккита ўртамиёна футбол жамоасининг ўйинидан олган таассуротларингиз уларга қизиқ бўлмаса керак.

Айнан шунинг учун ҳам ўз фикрингизни билдиришда эҳтиёткорроқ бўлинг. Агарда сиз канални шахсий блог тарзида юритмаётган бўлсангиз, унда контент мазмунида меъёрдан ошмаганингиз маъқул.

  1. Жудаям тез-тез пост қўйманг.

Каналга пост чиқариш учун энг мақбул оралиқни белгилаш мушкул, чунки бунинг учун аудиториянгиз фаоллигини таҳлил этишингиз даркор. Аммо эсда тутинг: тез-тез пост жойлагандан кўра, уларни сийраклатиш яхшироқ. Ўртача фойдаланувчи 2–10 та каналга обуна бўлади. Агар шуларнинг ҳар биридан кунига бир нечта билдиришнома келадиган бўлса, уларнинг барчасини очиб кўришга вақти ё ҳафсаласи етишмаслиги мумкин.

Қайсидир каналларда кунига 2–3 марта пост чиқариш одат тусига кирган. Бошқалари кунига битта, айримлари эса ҳафтада бир-иккита пост билан ҳам чекланишади. Баъзилари бўлса кунига 10-15 та пост билан обуначиларнинг жонига тегишга ҳам улгуришади.

  1. Мураккаблаштириб юборманг, ихчамроқ форматга солинг.

Telegram’га кишилар бирор нима ўқиб ўтириш учун киришмайди. Мессенжернинг формати буни қабул қилмайди. Шу боис, публикацияларни имкон қадар ихчамлаштиринг. Агар барибир сал каттароқ матн қўйишга тўғри келадиган бўлса, уни форматланг – шунда ўқувчи зерикмайди. Бунинг учун Markdown белгиларини қўлловчи ботлар мавжуд. Бироқ бу борада ҳам ҳаддан ошиб кетманг, ўзининг ички дизайнерингизни сақлаб қолинг.

  1. Реклама борасида инсофли бўлинг.

Telegram аудиторияси рекламадан қачон безор бўлмайди – қачонки уларнинг сони ҳаддан ошиб кетмаса ва эълонлар мазмуни жиғига тегадиган бўлмаса. Шу боис, постларингизда «мана бу карточка шаклидаги ажабтовур йиғма пичоқ ҳақидаги маълумотни мутлақо тасодифан учратиб қолганингиз ва уни ФАҚАТ БУГУН атиги 99999 сўмга сотиб олиш мумкинлиги»ни ёзмаганингиз маъқул.

  1. Аудиторияни тадқиқ этинг.

Канал аудиториясининг жалб этилганлигини кузатиш учун қўлланувчи жиҳозлар Telegram’да кўп эмас. Одатда сиз фақат обуначиларингиз сонини ҳамда ҳар бир публикациянгизни қанча киши кўрганини кузата оласиз.

Буларга қўшимча тарзда каналингизда сўровномалар ўтказишингиз мумкин. Агарда обуначиларингиз сони 2000 нафардан ошса-ю, лекин сўровномада атиги 50 тача киши қатнашса, демак, сиз ниманидир нотўғри қиляпсиз экан – контентингиз аудитория учун қизиқарли бўлмаяпти.

Юқоридагиларга қўшимча тарзда, Telegram-каналларнинг турли йўналишлардаги биринчи ва қиз-аёлларга бағишланган иккинчи тўпламига, рус тилини ўрганувчиларга аталган учинчи ҳамда киноманларга мўлжалланган тўртинчи тўпламига ҳам назар солишингизни тавсия этамиз.

Шунингдек, Telegram’даги энг яхши ботлар ҳақидаги мақоламиз ва уларнинг 2-тўплами ҳам сизнинг эътиборингизни тортса керак.

Дарвоқе, сайтимизнинг 7000 нафардан ошиқ обуначиси бўлган «Terabayt.uz – Xabarlar» (@terabaytuz) ҳамда 1900 нафардан зиёд фойдаланувчи кузатиб келаётган «Terabayt.uz-Texno bozor» (@teramarket) каналларига ҳам обуна бўлгансиз-а?