iPhone’да тўғри суратга олишни ўрганамиз (видеоқўлланмалар)

  •   DiMaX
  •  2137
  •  20.05.2017 10:38

iPhone’да тўғри суратга олишни ўрганамиз (видеоқўлланмалар)

Apple смартфонларининг камераси сифатли бўлгани боис, уларда расм ва видеоларни суратга олиш анча самаралидир. Жумладан, iPhone 7 бу борада 82 минг долларлик Arri Alexa билан беллашганидан ҳам хабарингиз бор.

Имкон қадар кўпроқ фойдаланувчилар iPhone’да ана шундай сифатли суратларни олишни ўрганишлари учун, Apple ўзининг YouTube-каналида ҳамда сайтида махсус роликлар жойлади. Бу лавҳалар орқали iPhone камерасида тўғри расмга тушириш сирлари соддагина қилиб кўрсатиб берилган.

Айтиш мумкинки, бу – Apple тақдим этган ўзига яраша бошланғич мобил фотосураткашлик курсидир. Компания ўз каналига фотосуратларнинг энг оммалашган беш турини тасвирга муҳрлаш бўйича тавсияларини бериб ўтган: портретлар, макро, экшн, панорама ҳамда кечки суратлар.

Уларда бирорта ҳам мураккаб ёритиш схемалари ёки профессионал атамалар қўлланмаган. Барча маълумотлар ўта содда ва қулай шаклда тақдим этилган. Масалан, кечқурунги портретни суратга олиш шундай тушунтирилган: телефонни чиқарамиз, чақноқни ёқамиз, ёруғлик манбаини топамиз, яхши чиқадиган ракурсни танлаймиз – бўлди!

Айтиш мумкинки, булар – ўта оддий, бошланғич даражадаги маслаҳатлар, бироқ улар чиндан ҳам амалий характерга эга. Ахир, кўпчилик ҳатто шу оддий қоидаларга ҳам амал қилмасдан суратга олаётганига ҳаётда гувоҳ бўляпмиз-ку.

Агарда сизга бу борада кўпроқ мисоллар керак бўлса, Apple расмий сайтида ташкил этилган махсус саҳифага киришингиз мумкин. У ерда яна қўшимча 11 та видеолавҳа жойланган бўлиб, уларда турли вазиятларда суратга олиш сирлари содда тарзда кўрсатиб берилган.

Айтиш керакки, бу – компания аввалроқ маълум қилган, катта ўқув курсининг бир қисми, холос. Бу каби видеодарслардан ташқари, компания айрим хорижий Apple Store’ларда турли профессионал фотосураткашлар билан мастер-класслар ҳам уюштиришни ваъда қиляпти. Уларга барча истовчилар киришлари мумкин бўлади.

Буларнинг барчаси фойдаланувчиларнинг Apple маҳсулотларига содиқлигини оширади. Тан олиш керак, ўз ихлосмандларига бундай ғамхўрлик қилишга ҳар бир компания ҳам қўл уравермайди. Фотосураткашлик асосларини ўрганиб қўйиш эса ҳеч кимга ортиқчалик қилмайди, нима дедингиз?

Хабарларни тез ва осон ўқиш учун Андроид иловамизни сақлаб олинг.