Apple талабига кўра, Telegram iOS’дан ўйинларни олиб ташлади

Telegram мессенжерининг iOS операцион тизимига мўлжалланган янги талқинидан HTML5 очиқ кодли дастурлаш платфомасида ёзилган ўйинлар олиб ташланди. Бу ўйинлар учун чат ойнаси очилиб, уларни мессенжернинг ичида ўйнаш мумкин бўларди. Энди улар учун Safari браузерининг алоҳида саҳифаси очилади.

Telegram хизматида ўйинлар 2016 йилнинг сўнгида пайдо бўлган эди. HTML5 тилида ёзилган ўйинлар фойдаланувчининг сўровига кўра, одатий веб-саҳифа кўринишида очиларди. Яъни, улар қурилма хотирасини банд қилмаган. Бу ўйинларни Apple’нинг iPhone 4’дан кейинги смартфонларида, шунингдек Android 4.4’дан юқори тизимларда ўйнаш мумкин.

Ишлаб чиқарувчиларнинг фикрига кўра, Apple қарори Telegram’нинг iOS-версияисида HTML5 тилида татбиқ қилинган WebView таркибий қисми билан боғлиқ. Бу компонент Telegram’га янги контентни Apple билан келишмасдан туриб ҳам ўзгартириш имконини беради. Apple эса буни хоҳламайди, албатта.

Мисол учун, бугунги ўйинлар фойдаланувчининг географик жойлашув манзилини билиб бериши мумкин. Бунинг учун эса, Telegram эмас, Apple жавобгар бўлади.

Шунингдек, WebView орқали Telegram орқали тўловни амалга ошириш ҳам мумкинлиги Apple’га малол келган бўлиши мумкин. Боиси, “Олма”нинг ўзи ҳам унга фойда келтириб турган шахсий тўлов тизимига эга.

Telegram асосчиси Павел Дуровнинг маълум қилишича, Apple мессенжердан HTML5-ўйинларини олиб ташлашни талаб қилган. Акс ҳолда, Telegram’ни App Store дўконидан ўчириб ташлашни айтиб, пўписа қилган.