Тақдим этилмаган Samsung Galaxy Note 8 фото ва видеода кўрсатилди
Хитойнинг WEIBO микро-блоглар сайтида Samsung Galaxy Note 8 фаблетининг ташқи кўриниши акс этган сурат жойланди, деб ёзади Ferra.Ru. Аввалроқ мазкур моделнинг макети Samsung Galaxy S7 билан ўзаро таққосланган видеолавҳа ҳам эълон қилинган эди.
Фотосуратдан келиб чиқадиган бўлсак, Samsung’нинг янги фаблети объективлари тикка жойлашган қўшалоқ асосий камерага эга. Шунингдек, унда қўшалоқ ёруғлик-диодли чақноққа ўхшаган деталь ҳам бор.
Қурилманинг орқа ёки олд панелида ҳам бармоқ изи сканери йўқлиги катта аҳамиятга эга. Демак, Samsung аввалги моделларда учраган – мазкур датчикни экран остига жойлаштиришга халақит берган муаммони ҳал этган кўринади. Компания ўзининг Galaxy S8 ҳамда Galaxy S8+ моделларида бармоқ изи сканерини орқа панелга – камера ёнига жойлаштирган, зеро, энди уни экран остига жойлаб бўлмас эди.
Хабарларга кўра, Galaxy Note 8 экранининг диагонали 6,3 дюйм, унинг аккумулятори эса 3700 мА/соат сиғимга эга бўлади. Фаблетнинг процессори бўлса икки хил талқинда: АҚШда сотишга мўлжалланган версиясига Snapdragon 835 чипсети, қолган мамлакатларда савдога чиқариладиган версияларига эса Exynos 8895 SoC ўрнатилади.
Қуйидаги видеода Samsung Galaxy Note 8 макети Galaxy S7 билан таққосланганини кўришингиз мумкин:
PhoneArena нашрининг ёзишича, Galaxy Note 8 модели 1–6 сентябрда Берлинда бўлиб ўтадиган IFA 2017 шоусида тақдим этилади.
Эслатиб ўтамиз, Galaxy Note 8’нинг суратлари аввалроқ тарқаб кетган, DBS Designing студияси бўлажак илғор гаджетнинг рендерларини тайёрлаб, жамоатчилик эътиборига ҳавола қилган эди. Қурилманинг янги авлод камера инновациясига эга бўлиши ҳақида ҳам хабар берганмиз.
