Samsung дунёдаги илк чўзилувчан OLED-дисплейни тақдим этади
Инновацион ғоялар бўйича етакчиликка интилаётган Samsung Display муҳандислари қайишқоқ OLED-панеллар билан чекланиб қолишмаяпти. Шу ҳафтада Лос-Анжелесда бўлиб ўтадиган Display Week 2017 кўргазмасида улар дунёда биринчи чўзилувчан дисплейни намойиш этишмоқчи, деб ёзади Yonhap.
Ҳақиқий 3D Touch
Хабарда айтилишича, тадбирда диагонали 9.1 дюймлик OLED-экран намойиш этилади. Мазкур «резинасимон» панель бармоқ билан босилганида 12 миллиметргача чўзила олади ва бунда ундаги тасвир ўзининг юқори сифатини асло йўқотмайди.
Samsung Display’дан таъкидлашларича, бундай дисплейлар «буюмлар интернети» қурилмаларида, шунингдек, сунъий интеллект билан боғлиқ соҳаларда қўлланиши мумкин. Ҳали компания бу борада бирор аниқ мисол айта олмаган бўлса-да, мазкур иддаолар асосли. Балки, қолган тафсилотлар кўргазма давомида қилинадиган тақдимотда ошкор этилса керак.
Display Week 2017 тадбири 23–25 май кунлари бўлиб ўтади.
Қачон чиқар экан?
The Investor нашри Samsung’нинг эгилувчан – қайишқоқ қурилмаларининг чиқиш муддати борасида экспертлар фикри билан қизиқиб кўрди.
Таҳлилчиларнинг ҳисоблашларича, компаниянинг энг дастлабки марралари орасида етакчиси – ромсиз дизайнга эга смартфонлардир. Букилувчи экранли қурилмалар эса 2019 йилдан аввал чиқмаса керак.
