$99 долларлик UMIDIGI Crystal’нинг илк ҳақиқий суратлари
2014 йилда Sharp компанияси Aquos Crystal номли ромсиз смартфонни намойиш қилган бўлса ҳам, 2016 йилда Xiaomi тақдим қилган Mi Mix ромсиз дизайндаги кутилмаган смартфон сифатида жаҳон миқёсида олқишларга сазовор бўлди. Шундан сўнг ромсиз смартфонларнинг “эраси” бошланди, дейиш мумкин.
Хитойнинг UMIDIGI номли ёш компанияси эса “UMIDIGI Crystal” номли ромсиз ва ҳамёнбоп смартфонни ишлаб чиқаришини маълум қилганида, кўпчилик 99 АҚШ долларига бундай смартфонни ишлаб чиқаришга шубҳа билан қараган эди.
Айни пайтда эса 99 доллар эвазига UMIDIGI Crystal’га буюртма бериш мумкин. Ҳозиргача бу модел Хитойда 20 000 дона миқдорида аввалдан буюртма қилинган.
Cмартфон корпуси пишиқ металл қотишмасидан тайёрланган. UMIDIGI Crystal’га AMOLED матрицали дисплей билан таъминланган, диагонали 5,5 дюйм бўлган экран ўрнатилган. Унинг пикселлар сиғими Full HD.
Смартфонни 2 талқинда ишлаб чиқариш режа қилинган. Улар бир-биридан камера модуллари билан фарқланади: яъни юқори талқиннинг бош камераси 2 та камера сенсоридан иборат бўлади. Ҳар иккала смартфон учун Helio P25 процессори, 4 гигабайтли тезкор ва 64 гигабайтли доимий хотира танланган.
UMIDIGI Crystal илк маротаба Хитойдаги электроника маҳсулотлари кўргазмасида намойиш этилган. Ундан фойдаланиб кўрганларнинг маълумотларига кўра, смартфон Android 7 Nougat операцион тизимининг ўзлаштирилган талқинида фаолият кўрсатади.
