Huawei MacBook’га рақиб ноутбукни сотувга чиқармоқда
Huawei 2016 йилда намойиш қилган MateBook “2 таси биттада” тамойилига асосланган — бир қараганда планшет, бир қараганда ноутбук шаклига кирадиган гаджет. Ўшанда бу сенсор экранли қурилмани кўпчилик Apple MacBook билан таққослаган эди. 23 май кунги тақдимотда эса MateBook’нинг “X” талқини, яъни бус-бутунлигича ноутбукни эслатадиган версияси намойиш қилинди. Энди у экрандан ажралмас клавиатураси билан MacBook’га янаям ўхшаб кетади.
13 дюймли MateBook X “кўчма компютери” 1,05 кг вазнга эга. Унга 12,5 мм.ли юпқа ва енгил корпус, экран панелининг 88 фоиз қисмини эгаллаб турган, Gorilla Glass ҳимоя шишаси билан қопланган 2K (2160 x 1440 пикселли) сиғимли дисплейга эга. Унинг экран атрофидаги ром ҳошиясининг қалинлиги 4 миллиметр.
Huawei девайсда аэрокосмик соҳада фойдаланиладиган, шовқин чиқармайдиган салқинлатиш технологиясини жорий қилган. MateBook X’да Intel Core i7 (2,7-3,5 ГГц) ёки i5 (2,5-3,1 ГГц) кучли процессорлар ўрнатилган. Тезкор хотира сиғими 4/8 ГБ, доимий – 128, 256 ёки 512 ГБ. Ундаги 4100 мА соат сиғимли аккумулятор 10 соат ишлаш учун етарли.
Huawei’нинг маълум қилишича, MateBook X — бу Dolby компанияси билан ҳамкорликда тайёрланган Dolby Atmos Sound System функцияси ва махсус динамикларга эга илк ноутбук. Ишлаб чиқарувчи, шунингдек, ёқиб-ўчириш тугмасига бармоқ излари сканерини ҳам ўрнатган. Бу сканер Windows’нинг шахсни аниқлаш тизимини қўллаб-қувватлайди.
MateBook X 3 рангдаги корпусда: тилла ранг, самовий кулранг ва оч-пушти рангда ишлаб чиқарилади. MateBook X шу йилнинг ёз фаслида Европада 1399 евродан 1699 еврогача бўлган нархларда сотувга чиқарилади.
